ने. सं. ११४४ कछलागा सप्तमी -

लँ स्यनाः ६ अर्बया सामान थात

मोहनिबलय् चिनियाँ सामानया भाः थहां वनीगु सम्भावना

येँ – नेपाः चीन स्वाइगु रसुवागढीया लँ स्यनाः नेपाः हयाच्वंगु करिब ६ अर्ब तकाया सामान चीनया भूमिइ हे थानाच्वंगु दु । यदि आः वइगु मोहनि तकया दुने नं थ्व सामान नेपाः हयाः बजारय् बी मफुत धाःसा मोहनिबलय् वसःतासःया भाः तसकं थहां वनीगु खँ व्यापारीतय्सं धाःगु दु ।

नेपाः–चीन सीमाय् लाःगु रसुवा–गढीं येँय् वयेगु लँय् थाय्थासय् चलः वंगु व निथाय् ताँ समेत चुइका यंकूगुलिं लँ पूवंक हे बन्द जुयाच्वंगु दु । अन लँ बन्द जूगु लछि स्वयां अप्वः दयेधुंकूगु दु ।सम्बद्ध व्यापारीतय्सं धाः कथं नेपाः हयाः मीमाःगु सामान फुक्क चीनपाखे हे थानाच्वंगु कारणं वंगु निला न्ह्यवंनिसें बैंकया ब्याजं अथें पुले मालाच्वंगु दु ।

उखे सामान ज्वना वःगु कन्टेनरतय्त नं ढिला जूगु वापत ध्यबा पुले मालीबलय् व्यापारीतय्त तःधंगु हे मार जुयाच्वंगु दु । व्यापारीतय्सं खास यानाः न्ह्यःने वयाच्वंगु मोहनि नखःयात लक्षित यानाः वसः, लाकां आदि थेंज्याःगु सामान ज्वना वःगु खः । थुकी स्वनिगःया सलंसः व्यापारीतय्गु सामान लानाच्वंगु दु ।

लँ स्यनाः चीनया भूमिइ १२०० गः कन्टेनर वंगु लछि न्ह्यवंनिसें अथें थानाच्वंगु दु । थुकिं यानाः कन्टेनर चले याना वःपिं चालक व सहचालकतय्त नं तसकं सास्ती जुयाच्वंगु खँ धाःगु दु । छखे इलय् सामान हये मखंगु व मेखे बैंक ब्याज व कन्टेनरया भाडा अप्वःगु कारणं आः मोहनिबलय् सामानया भाः थिके जुइ फइगु खँ व्यापारीतय्सं धाःगु दु ।

हिमालयन सीमापार ब्यापार संघं धाः कथं थःपिंत जूगु थ्व घाटाया असुल उपर व्यापारीतय्सं सामान हे मियाः याइगु जूगुलिं आः वइगु मोहनिबलय् चिनियाँ सामानया भाः थिके मयासें मगाइगु अवस्था दु । थौंकन्हय् धाःसा बजारय् सामानया अभाव जुयाच्वंगु दु ।

लँ दयेकेगु जिम्मा सेनायात
लछि न्ह्यवंनिसें लँ स्यनं नं सरकारं दयेकेगुपाखे कुतः मयाः धकाः व्यापारीतय्सं द्वपं बियाच्वंगु हे इलय् सरकारं थ्व लँ दयेकेगु जिम्मा नेपाली सेनायात बिउगु खँ सीदुगु दु । सेनां नं तत्काल ताँ दयेके फइगु सम्भावना मदुगुलिं आः मेथासं लँ पिकायेगु कुतः यानाच्वंगु दु ।

तर मेथासं लँ पिकायेत नं छथाय् निथाय् पहाड हे तछ्याये माःगु व उकिया लागिं विष्फोटक पदार्थ हये माःगु जुयाच्वंगु दु । सेनां उकिया लागिं माःगु विष्फोटक पदार्थ कायेके छ्वःगु दुसा आः वइगु निवाःया दुने पहाड तछ्यानाः जूसां न्हूगु वैकल्पिक लँ पिकाये फइगु अनुमान याःगु दु ।