फोनिज बागमति प्रदेशय् न्हूगु नेतृत्व

येँ- नेपाल आदिवासी जनजाति पत्रकार महासंघ (फोनिज)या बागमति प्रदेशया निक्वःगु महाअधिवेशन प्रदेश राजधानी हेटौंडाय् क्वचाल । वंगु पुस २१ व २२ गते निन्हुयंकं जूगु निक्वःगु प्रादेशिक महाधिवेशनं युवराज श्रेष्ठया अध्यक्षताय् न्हूगु ज्यासना पुचः नं ल्यःगु खः ।

श्रेष्ठया अध्यक्षताय् २१ म्हेसिया ज्यासना पुचः ल्यःगु खःसा छम्ह लिपा मनोनित याइगु जूगु दु । ज्यासना पुचलय् राजेश रुम्बा, डोल्मा शेर्पा (मिसा न्वकु), श्याम राना मगर मूछ्याञ्जे, शिशिर दोङ छ्याञ्जे (संगठन), राजु नापित छ्याञ्जे (संस्थागत) व शंकर श्रेष्ठ दांभरिंकथं ल्यःगु दु ।

अथे हे दुजलय् मिसापाखे मिना श्रेष्ठ, कमला तामाङ व पासाङ शेर्पा, मिजं खुल्ला दुजलय् पूर्णबहादुर मगर, उद्धव कुमार श्रेष्ठ, अर्विन्द्रमान सिंह, सरोज लामा, पासाङ घिसिङ, रविन्द्र सिंजाली मगर, डिक्की डोल्मा शेर्पा, पूर्वा तामाङ, संजय चौधरी व हिरालाल गुरुङ सर्वसम्मतं ल्यःगु दु ।

थुकथं हे अनुशासन समिति संयोजकय् बाबुकाजी श्रेष्ठ, दुजलय् रिदेन महर्जन व रसिया श्रेष्ठयात ल्यःगु दुसा लेखा समितिया संयोजकय् राजेन्द्र मानन्धर ‘नीलः’ व दुजलय् दोलख गुरुङ व राकेश चौधरीयात ल्यःगु दु । महाधिवेशनं संघीय महाधिवेशनया प्रतिनिधिइ सम्झना श्रेष्ठ, पूर्णभक्त दुवाल व पेमा लामायात सर्वसम्मतं ल्यःगु दु ।

थ्व स्वयां न्ह्यः बागमति प्रदेशया निक्वःगु प्रादेशिक महाधिवेशनया उलेज्या बागमति प्रदेशया सामाजिक विकास मन्त्री कुमारी मोक्तानं यानादीगु खः । समितिया अध्यक्ष पेमा लामाया सभापतित्वय् जूगु ज्याझ्वलय् प्रदेशया खानेपानी, उर्जा व सिँचाईमन्त्री वसन्तप्रसाद मानन्धर विशेष पाहांकथं झायादीगु खःसा पत्रकारतय् थीथी संगठनया प्रतिनिपिनिगु नं उपस्थिति दुगु खः ।

उलेज्या स्वयां न्ह्यः पदयात्रा यासें हेटौंडा बजाः चाःहिउगु खःसा उलेज्याझ्वलय् थीथी पत्रकारपिंत सम्मान व पुरस्कृत नं याःगु खः ।