संचार माध्यमया अनुगमनय् सेना व प्रहरी दुथ्याकूगुलिं विराेध

येँ (नेपालभाषा टाइम्स)÷ निर्वाचन आयोगया प्रेस सम्बन्धी ज्याकुथिइ सेना व प्रहरीया प्रतिनिधि तयेवं उकिया आलोचना जूगु दु । वइगु मंसिर ४ गते जुइगु प्रतिनिधि सभा व प्रदेश सभाया निर्वाचन सम्बन्धय् सामाजिक सञ्जाल व सञ्चार माध्यमया अनुगमन यायेगु निंतिं आयोगं दयेकूगु संयन्त्र (प्रेस अफिस)य् नेपाली सेना व नेपाल प्रहरीया साइबर ब्यूरोया प्रतिनिधितय्त नं तयेवं थुकियात कयाः आलोचना सुरु जूगु खः ।

अभिव्यक्ति स्वतन्त्रताया सः तया वयाच्वंपिं विज्ञ व अभियान्ततातय्सं आयोगया थ्व ज्यां प्रेस स्वतन्त्रता व लोकतन्त्रया हे उपहास जूगु खँ धाःगु दु । उमिसं सेनायात संचार माध्यमया अनुगमन याकेगु धयागु लोकतन्त्रया मान्यता अःखः जूगु खँ धाःगु दु ।

निर्वाचन आयोगया थ्व ज्यायात कयाः नेपाल पत्रकार महासंघं नं आपत्ति प्वंकूगु दु । महासंघया पुलांम्ह अध्यक्ष राजेन्द्र दाहालं आचार संहिता उल्लंघन बारे जंगी कर्मचारीं याइगु निर्णययात कयाः न्ह्यसः दनी धासें थ्व छुं नं कथं लोकतन्त्रया मान्यता कथं मजूगु धाःगु दु । वय्कलं बिबिसीलिसे खँ ल्हासें धाःगु दु, ‘सेना धयागु चुनावया इलय् स्वंगू तह पिने च्वनीगु संरचना खः । तर आचार संहिता स्वयेगु धकाः प्रहरी व सेनायात दुथ्याकाः कारवाही यायेत स्वयेगु धयागु कानुनी राज्यया सिद्धान्त लिसे मिले मजू ।’

मेखे प्रमुख निर्वाचन आयुक्त दिनेश थपलियां सामाजिक सञ्जालय् न्यनीगु मिथ्या सुचं नियन्त्रण यायेत विशिष्ट जनशक्ति कथं सुरक्षा निकायया प्रतिनिधिपिंत दुथ्याकाःगु प्रतिक्रिया बियादीगु दु ।

थ्व ज्याकुयात सामाजिक सञ्जाल व डिजिटल मिडियाय् वःगु भ्रमपूर्ण व मिथ्या सुचना तुरुन्त चिइकाः कारवाही यायेगु निंतिं सिफारिस यायेगु अधिकार बियातःगु दु । थ्व ज्याकुथिं सामाजिक सञ्जालया ग्वाहालिं उम्मेदवारतय्सं गुलि चुनाव खर्च यात धयागु नं अनुगमन याइगु खँ धाःगु दु ।
थ्वहे झ्वलय् नेपाल पत्रकार महासंघ वइगु निर्वाचनयात लक्षित यानाः सञ्चार माध्यम व समाजिक सञ्जालय् सम्प्रेषण जूगु सामग्रीया अनुगमन यायेत निर्वाचन आयोगं दयेकेगु ‘प्रेस अफिस’ यात कयाः आपत्ति प्वंकूगु दु ।

सञ्चार माध्यमय् सम्प्रेषण जूगु सामग्रीया अनुगमन व नियमन यायेगु ज्या प्रेस काउन्सिल नेपालया जूगु व आयोगं थम्हं हे क्षेत्राधिकार स्वयां पिने वनाः सेना व प्रहरी दुथ्याःगु संयन्त्र दयेकेगु ज्या निरंकुशतन्त्रय् जक जुइगु खँ नं विज्ञप्तिइ न्ह्यथनातःगु दु ।

पत्रकार महासंघया महासचिव रोशन पुरी जारी याःगु विज्ञप्तिइ धयातःगु दु, ‘आयोगं थःगु क्षेत्राधिकार दुने च्वनाः राज्यया संयन्त्रलिसे सहकार्य यानाः क्वचायेकीगु निर्वाचन हे लोकतान्त्रिक मूल्य मान्यता कथं जुइगु आम बुझाइ दु । महासंघ थ्व निर्णय तत्काल भिंकाः अभिव्यक्ति स्वतन्त्रता व प्रेस स्वतन्त्रताया सम्मान यायेत निर्वाचन आयोगयात इनाप यानाच्वना ।’

लिसें निर्वाचन आचार संहित अन्तर्गत प्रेसलिसे सम्बन्धित विषय महासंघ लगायत प्रेस लिसे सम्बन्धित सरोकारवाला लिसे सहलह यानाः दयेकेत महासंघं यानागु इनापयात तकं आयोगं बेवास्ता याःगु जिकीर नं यानातःगु दु ।

उकथं हे महासंघं निर्वाचनया फुक्कं प्रक्रियाया विषयसं सञ्चार माध्यमया परिचयपत्र वा पत्रकार महासंघया परिचय पत्र वा सरकारी निकायं जारी पत्रकार परिचयपत्रया आधारय् निर्वाध समाचार संकलन, प्रकाशन लिसे प्रसारणया वातावरण दयेकेत नं माग यानातःगु दु । आयोगं थःगु निर्णय मभिंकल धाःसा नेपाःया सञ्चार क्षेत्रं थुकिया प्रतिवाद व अवज्ञा यायेगु ख्याच्वः नं बियातःगु दु ।

सम्बन्धित बुखँ

LEAVE YOUR COMMENTS