निदुगं राजश्व कायेत सर्भर बन्द याःगु चर्चा

येँ (नेपालभाषा टाइम्स) – निन्हु न्ह्यवनिसें ठप्प जुयाच्वंगु यातायात कार्यालयया सर्भर म्हिगः न्हिनय् निसें चले जूगु दु । सोमवाःनिसें यातायात कार्यालयया सर्भर डाउन जूगुलिं लाइसेन्स नविकरण लिसें थीथी सेवा बन्द जूवंगु खः । प्राविधिकतय् कुतः लिपा म्हिगः ३ बजे निसें यातायातया सर्भर चले जूगु खँ यातायात व्यवस्था विभागया आइटी डाइरेक्टर केशव खतिवडां धयादगिु दु ।

सर्भर चले मजूगुलिं एकान्तकुनाया यातायात ज्याकुथिइ निन्हुतक प्रिन्ट जुया वःगु लाइसेन्स बीगु व ब्लुबुक नवीकरण यायेगु बाहेक मेगु फुक्क ज्या ठप्प जूगु खःसा चाबहीया ज्याकुथिइ नं प्रिन्ट लाइसेन्स वितरण व न्हूगु लाइसेन्सया लिखित परीक्षा व ट्रायल कायेगु ज्या जक जूगु खः । अथेहे ठुलो भ¥याङया सर्भर नं डाउन जूगु धासें फुक्क सेवा अवरुद्ध जूगु खः ।

निन्हुतक सेवा बन्द जूगुलिं विशेषतः लाइसेन्स नविकरण यायेमाःपिं मर्काय् लाःगु दु । सरकारं वइगु साउनं निसें लाइसेन्स नवीकरण यायेगु व न्हूगु लाइसेन्स कायेगु निंतिं राजश्व निदुगं कायेगु धयातःगु दु । थ्व अवस्थाय् चालु आर्थिक दँया अन्तय् लाइसेन्स नवीकरण जुइमफुत धाःसा राजश्व निदुगं पुलेमालीगु जुइ । अथे जूगुलिं एकान्तकुनाय् लाइसेन्स नवीकरण याःवःपिंसं सरकारं निदुगं ध्यबा कायेगु निंतिं हे जानाजान सर्भर डाउन याःगु द्वपं बिउगु दु ।

लाइसेन्स नवीकरणया निंतिं थौंकन्हय् मोटरसाइकल स्कुटरया निंतिं झिंन्यासः, चिग्वःगु गाडीया निंतिं निद्वः पूसा गाःसा साउन १ गते निसें मोटरसाइकल, स्कुटरया निंतिं स्वद्वः व चिग्वःगु गाडीया निंतिं प्यद्वः पुलेमाली । थुकथं हे मेमेगु वर्गया लाइसेन्सया निंतिं नं न्हापाया स्वयां निदुगं राजस्व पुलेमाली ।