बुद्धवाणी सफू पितब्वज्यालिसें हना व सिरपाः देछा

येँ (नेपालभाषा टाइम्स) – समानान्तर बौद्ध आध्यात्मिक पत्रिका सम्यक सन्देशया ग्वसालय् न्हू बानेश्वरय् च्वंगु विश्व शान्ति विहारय् जूगु छगू ज्याझ्वःया दथुइ ‘बुद्ध वाणी’ नांया सफूया पितब्वज्या याःगु दु । उगु हे ज्याझ्वलय् बौद्ध धर्मया ख्यलय् ताःई न्ह्यःनिसें योगदान बियादीपिं व थीथीकथं भूमिका म्हितादीपिंत हनेज्या व बौद्ध प्रतिभा सिरपाः नं लःल्हाःगु खः ।

विश्व शान्ति विहारया प्रमुख भिक्षु बोधिज्ञान महास्थविरया प्रमुख आतिथ्यताय् जूगु ज्याझ्वलय् वसपोलं डा. गोरखमान श्रेष्ठं अनुवाद यानादीगु सफूयात कयाः बौद्ध विद्वानलिसें सह प्राध्यापक मदनरत्न मानन्धरं समीक्षात्मक टिप्पणी यानादीगु खः ।

ज्याझ्वलय् थेरवाद बुद्ध धर्म, परियत्ति शिक्षा, विपश्यना ध्यानलिसें सामाजिक ख्यलय् बियादीगु विशिष्ट व ज्वःमदुगु योगदानयात कयाः बौद्ध विदुषी नानीमैयाँ मानन्धर (येँ) व बौद्ध ख्यःया विशिष्ट व्यक्तित्वपिनिगु मदिक्क जीवनी च्वयेगु ज्याय् क्रियाशील व्यक्तित्व रत्नसुन्दर शाक्य (ख्वप)यात ‘भिक्षु अश्वघोष बौद्ध सेवा सिरपाः-२०८३’ लःल्हाःगु खः ।

अथे हे बौद्ध धर्म सम्बन्धी अध्ययन, अध्यापन, अनुसन्धान व लेखनय् योगदान बिया वयाच्वनाबिज्याःम्ह अनागारिका श्रद्धाचारी गुरुमां व बौद्ध साहित्य व संस्कृति बारे छगू दर्जनं मल्याक सफू च्वयाः पिथनादीम्ह नापं सुगत बौद्ध विद्यालयया पुलांम्ह प्राचार्य तीर्थरत्न शाक्य (येँ)यात ‘केदारनाथ-लिलादेवी शिक्षा सिरपाः-२०८३’ लःल्हाःगु खः । लिसें परियत्ति शिक्षाय् बोर्ड हयाबिज्याःपिं निम्ह श्रामणेरपिंत नं सिरपाः लःल्हाःगु खः ।

सिरपाःया दाता केदारनाथ श्रेष्ठया सभापतित्वय् जूगु ज्याझ्वलय् सम्यक सन्देशया अध्यक्ष दीपक भेटुवाल ‘दीप सागरं’ लसकुस यानादीगु खः ।