सक्व–नगरकोट स्वाइगु तां दयेके पूमवनीवं त्वःधुल

येँ – सक्वं ख्वपया नगरकोट पिचायेकेत दयेकूगु तां दयेकेच्वंगु इलय् त्वःधूगु दु । तां दयेकेगु झ्वलय् बिउगु तेका मिले मजुयाः तां त्वःधूगु खँ शंखरापुर नगरपालिकाया मेयर सुवर्ण श्रेष्ठं ‘नेपालभाषा टाइम्स’यात कनादीगु दु ।

वय्कया कथं त्वःधूगु तां हाकनं दयेकेगु तयारी जुयाच्वंगु धासें झिंन्यान्हुया दुने मेगु ढलान जुइगुु खँ कनादीगु दु । सक्व नगरपालिकां ५४ लाख तका स्वयां अप्वः खर्च यानाः थ्व ताँ दयेकाच्वंगु खः ।

मखे शंखरापुर नपा ७ वडाया वडा दुजः अर्चिन शाहीं धाःसा कमिसनया खेलया कारणं तां दयेकेगु झ्वलय् समस्या वःगु खँ धयादीगु दु । वय्कःया कथं तां दयेकेत गुलि बेस तयेमाःगु खः उलि मतःगु व डण्डी नं आवश्यक कथं मतःगुलिं यानाः तां त्वःधूगु खः । उगु तां वंगु चैत २४ गते ढलान यायां हे त्वःधूगु खः ।