स्वनिगःया सम्पदा खतरां पिने लात

येँ – युनेस्कों विश्व सम्पदाया धलखय् लानाच्वंगु स्वनिगःया सम्पदायात मेगु दछिया निंतिं खतराया धलखय् मतयेगु निर्णय याःगु दु ।
अजरबैजानया बाकुइ जारी जुयाच्वंगु वल्र्ड हेरिटेज कमिटीया ४३ क्वःगु बैठकय् नेपाःयात तत्काल खतराया धलखय् मतयेगु निर्णय याःगु खँ नेपाः सरकारया प्रतिनिधित्व याःपिं पदाधिकारीतय्सं धाःगु दु ।

युनेस्कों मू कथं स्वनिगः दुने भुखाचं क्षति जूगु सम्पदा निर्माणय् जुयाच्वंगु ढिलाईप्रति चिउताः प्वंकूगु खँ सीदुगु दु । उकथं हे पुनर्निर्माणय् आधुनिक निर्माण सामग्री छ्यःगु बारे नं अन न्ह्यसः ब्वलंगु खँ धाःगु दु । नेपालय् सम्पदायात कयाः जुयाच्वंगु पुनर्निर्माणया अध्ययन यायेगु निंतिं युनेस्कोया प्रतिनिधित न्याला खुला लिपा नेपाः वइगु खँ धाःगु दु ।

उगु इलय् आः कमिटीं बिउगु सुझाव कार्यान्वयन यायेगु लिसें सम्पदाया अडिट याइगु व उगु पुचलं बीगु प्रतिवेदनया आधारय् वइगु दँय् जुइगु सम्मेलनय् नेपाःया सम्पदा खतराया धलखय् तयेगु वा मतयेगु धइगु बारे निर्णय याइगु खँ धाःगु दु ।

युनेस्कों ताः इलंनिसें नेपाःया सरकारं सम्पदा संरक्षणय् ध्यान मबिउ धइगु द्वपं बिसें स्वनिगःया सम्पदायात खतराया धलखय् तयेगु ख्याच्वः बिया वयाच्वंगु खः । स्वनिगःया पशुपतिनाथ देगः, बौद्ध, स्वयम्भू, येँ, यल व ख्वपया लाय्कू लागा व चाँगुनारायण देगःयात विश्व सम्पदाया धलखय् दुथ्याकातःगु दु ।