ने. सं. ११४४ चौलाथ्व द्वादशी -

बुदिंया भिंतुना म्येँ कासाय् सुमन मानन्धर न्हाप

येँ – नेपालभाषाय् बुदिंया भिंतुना म्येँ कासा क्वचाःगु दु । वंगु पुस १ गतेनिसें न्ह्याःगु ‘चेज बुदिं भिंतुना म्येँ कासा’ वंगु माघ ८ गते क्वचाःगु खः । मंगल धूनया लसय् नेपालभाषाया नांजाःम्ह म्येँ हालामि सुरजवीर वज्राचार्यं हालातःगु खःसा उकिया संयोजक जुगल डंगोलं यानादीगु खः । व हे म्येँयात थीथी म्येँ हालामिपिंत हालेगु निंतिं इनाप जूकथं क्वःछिनातःगु ईतकया दुने १२१ म्ह म्येँ हालामिपिंसं ब्वति काःगु खः ।

पेज थ्री बाःछि पौया ग्वसालय् चेज लिड टिभिया प्रयोजनय् जूगु बुदिंया म्येँ कासाय् मय्जु सुमन मानन्धर (ख्वपं) सिरपाः त्याकादीगु थुगु म्येँय् मुख्य सः बियादीम्ह वज्राचार्यं कनादीगु दु । कासाया नियमकथं उगु म्येँ यु–ट्युबय् दकलय् अप्वः स्वःगु आधारय् विजयी घोषणा याःगु खः । मय्जु मानन्धरं हालादीगु म्येँ यु–ट्युबलय् दकलय् अप्वः ७७,८१७ क्वःतक स्वःगु खः । सिरपाः कथं वय्कलं २४ इन्चया चेज लिड टिभि त्याकादीत सफल जूगु खः ।

ग्वसाः खलकं बिउगु जानकारीकथं म्येँ कासाया निंतिं बियातःगु ई तकया दुने यु–ट्युबय् स्वकुमिया ल्याखं सजेना चित्रकारं हालाीगु म्येँया स्वकुमि ५७,४९९ व लियांलिउ लायेत ताःलाःगु मन्जिल शाक्यं हालादीगु म्येँ ४८,०९९ नं स्वःगु खः । अथे हे प्यंगूगु थासय् लायेत ताःलाःम्ह राजु वज्राचार्यं हालादीगु भिडियो ४४,७१३, अमोघवीर वज्राचार्यं हालाीगु म्येँया भिडियो ४०,९५१ व विधान तुलाधरं हालाीगु म्येँया भिडियो ३२,२६९ नं स्वयादीगु खः ।

निर्णायक मण्डलया निर्णयकथं दकलय् बांलाःपिं न्याम्ह म्येँ हालामिपिं सुरजवीर वज्राचार्यं च्वयादीगु व जुगल डंगोलया लसय् म्हतिं छपु छपु म्येँ रेकर्डिङ यायेगु ह्वःताः बीगु जूगु दु । दकलय् अप्वः स्वकुमिया घोषणा लिपा दकलय् बांलाःम्ह म्येँ हालामिया नं घोषणा यायेगु व उकिया घोषणा छुं दिं लिपा जक यायेगु तयारी जुयाच्वंगु दु । कासाय् न्यादँनिसें झिंस्वदँ दुपिं झिंच्याम्ह मस्तय्सं नं ब्वति काःगु खः ।