भाषासेवी लक्ष्मीदास मानन्धर लुमंकल

येँ (नेपालभाषा टाइम्स)- लक्ष्मीदास मानन्धर स्मृति प्रतिष्ठानया ग्वसालय् थँहितिस्थित शान्ति शिक्षा मन्दिर माविया क्यबय् म्हिगः छगू ज्याझ्वःया दथुइ समाजसेवी, भाषासेवी नापं उद्योपति लक्ष्मीदास मानन्धरयात लुमंकेगु ज्या जुल ।

मदुम्ह मानन्धरया ९६ दँ बुन्हि लाकाः जूगु ज्याझ्वलय् लक्ष्मीदास मानन्धरया झ्वाताय् स्वां देछाया श्रद्धाञ्जली देछाःगु खः । ज्याझ्वलय् नेवाः न्ह्यलुवाः मल्ल के सुन्दर, नेवाः देय् दबूया नायः पवित्र वज्रावचार्य, नेपाल सम्वत न्हूदँ राष्टिय समारोह समिति ११४५ या नायः राजेन्द्रप्रसाद श्रेष्ठपिंसं मदुम्ह लक्ष्मीदास मानन्धरया व्यक्तित्वयात कःघानाः थःथःगु नुगःखँ तयादीगु खः ।

प्रतिष्ठानया नायः नारायणदास मानन्धरया सभापतित्वय् जूगु उगु ज्याझ्वलय् प्रा. डा. त्रिरत्न मानन्धरं शान्ति शिक्षा मन्दिर माविया स्थापना कालंंनिसेंया खँयात परिचयात्मक रुपं जानकारी बियादीगु खः ।

वय्कलं थँहितिया थुगु स्कुलयात क्वातुका यंकेत भाजु लक्ष्मीदास मानन्धरं म्हितादीगु भूमिका व योगदानयायात कयाः चर्चा यानादिलसा स्कुल स्थापना यायेत व न्ह्याकेत गुलि संघर्ष यायेमाः धइगु खँ थुगु स्कुृलया म्हिगःया संघर्षया खँयात प्वला स्वयावन धाःसा सीकेफइ व खंकेफइ धयादिल ।

सुजिव वज्राचार्यं न्ह्याकूगुु ज्याझ्वलय्् जगतसुन्दर ब्वनेकुथिया विद्यार्थीपिंसं मदुम्ह मानन्धरया विषययात कःघानाः च्वयातःगु चिनाखँ नं वाचन याःगु खः । समाज व भाषायात कयाः चिउताः तयाः थःगु जीवनकालय् उत्थानया ज्या याना वंपिंत न्ह्याबलें लुमंका च्वनेमाः धइगु भावना ज्वना थुकथंया ज्याझ्वः याःगु खः । ज्याझ्वलय् मदुम्ह मानन्धरयात लुमंका छगू मिनेट मौन धारण नं याःगु खः ।