म्येँ हालामि लसता जोशी नं निर्देशनय्
येँ (नेपालभाषा टाइम्स) – नांजाःम्ह म्येँ हालामि लसता जोशीं निर्देशनया ख्यलय् नं पलाः तयादीगु दु । झण्डै स्वंगू दशक न्ह्यःनिसें सांगीतिक ख्यलय् सक्रिय जुया वयाच्वनादीम्ह लसता जोशीं म्युजिक भिडियोय् नं अभिनय यानादीगु दुसा आः वयाः निर्देशनय् नं पलाः न्ह्याकादीगु खः ।
लसतां थः हे किजा शरदलाल जोशीया खस नेपाली भाय्या म्येँया म्युजिक भिडियो निर्देशन यानाः थ्व ख्यलय् पलाः तयादीगु खः । नेपाःया सांगीतिक ख्यःया तसकं नांजाःम्ह लय्चिनामि, म्येँ हालामि मदुम्ह द्वारिकालाल जोशी व नांजाःम्ह कलाकर नगिना जोशीया काय शरद थम्हं हे म्येँ च्वयाः लसय् हनातःगु ‘वेस्ट अफ टाइम’ म्येँया म्युजिक भिडियो निर्देशन यानादीगु खः । म्युजिक भिडियोया छाँयाकन व सम्पादन सोहन मानन्धरं यानादीगु खः ।
वंगु आइतवाः सीडीसी मलय् जूगु छगू ज्याझ्वःया दथुइ उगु म्येँया म्युजिक भिडियो पितब्वज्या याःगु खःसा ज्याझ्वलय् नेवाः देय् दबूया संरक्षक पवित्र वज्राचार्य, नांजाःपिं म्येँ हालामिपिं जुजुकाजी रंजित, प्रवेशमान शाक्य, भीम तुलाधर, गितार वादक देव राणा लगायतं म्युजिक भिडियोया थीथी पक्षयात कयाः नुगःखँ तयादीगु खः ।
LEAVE YOUR COMMENTS