वडाया जग्गा सार्वजनिक कायम यायेत भूमिका म्हितूपिंत हनेज्या
येँ (नेपालभाषा टाइम्स) – येँ महानगरपालिका १३ वडा नागरिक समाजया ग्वसालय् १३ वडाया जग्गा सार्वजनिक कायम यायेत भूमिका म्हितूपिं कानुन व्यवसायी व स्थानीय नागरिकयात सुभाय् देछालिसें हनेज्या याःगु दु । स्थानीय १३ वडाया ज्याकू तयातःगु जग्गा व भवनया स्वामित्वयात कयाः विवाद जुइवं सम्मानित येँ जिल्ला अदालतय् विचाराधीन जुयाच्वंगु मुद्दाय् अदालतपाखें स्थानीय जनताया पक्षय् फैसला याःगु खः ।
अदालतं स्थानीय जनताया पक्षय् ऐतिहासिक फैसला याःगु धासें जग्गा सार्वजनिक कायम यायेत भूमिका म्हितूपिं कानुन व्यवसायी व स्थानीयवासीयात सुभाय् देछासे हनेज्या याःगु खः ।
ताःई न्ह्यःनिसें येँ जिल्ला अदालतय् विचाराधीन छेँ–बुँ सम्बन्धी मुद्दाय् अदालतं वंगु असार ४ गते उगु सम्पत्ति सार्वजनिक कायम जुइकथं फैसला न्यंकूगु खः । वडा भवन दुगु जग्गा व्यक्तिया नामय् यंकेगु निंतिं जुयाच्वंगु कुतः विरुद्ध स्थानीय नागरिक समाज व जनस्तरं ताःई न्ह्यःनिसें कानुनी उपचार व सामाजिक संघर्ष याना वयाच्वंगु खः । अदालतया निर्णयं सार्वजनिक सम्पत्तिया रक्षा जूगु धासें वडावासीं लसता प्वंकूगु दु ।
छगू विशेया ज्याझ्वः यासें मुद्दाया कानुनी प्रक्रियाय् भूमिका म्हितूपिं, बहस पैरवी यानादीपिं व थुगु ज्याय् ग्वाहालि यानादीपिं अधिवक्ता व कानुन व्यवसायीपिंत खादा क्वखायेकाः हनेज्या याःगु खः ।
१३ वडा नागरिक समाजपाखें मुद्दाय् फिरादीया भूमिका म्हितादीपिं हरिभक्त मानन्धर, दीपक महर्जन, कुमारध्वज जोशी, धर्मनारायण महर्जनया सभापतित्वय् जूगु ज्याझ्वलय् कानुन व्यवसायीपाखें थुगु मुद्दाया दक्वं पक्षय् अग्रणी भूमिका म्हितादीम्ह अधिवक्ता रामशरण डंगोलं, १३ वडाअध्यक्ष ध्रुवनारायण मानन्धर, पुलांम्ह बागमति प्रदेश सांसद राजेश शाक्य, वरिष्ठ अधिवक्ता भरत खनाल लगायतं नुगःखँ तयादीगु खः ।
ज्याझ्वलय् नागरिक समाजया प्रतिनिधि, वडाया भद्र भलादमि, विशिष्ट व्यक्तित्वपिं, स्थानीय सामाजिक कार्यकर्ता, अभियन्तातय् सहभागिता दुगु खः ।
LEAVE YOUR COMMENTS