जेष्ठवर्ण महाविहारयात युनेस्कोया सिरपाः

येँ (नेपालभाषा टाइम्स) – यलया थेच्वय् च्वंगु जेष्ठवर्ण महाविहारयात सन् २०२५ या युनेस्को एसिया-प्रशान्त सांस्कृतिक सम्पदा संरक्षण पुरस्कार ‘अवार्ड अफ मेरिट’ हस्तान्तरण याःगु दु ।

नेपाःया निंतिं युनेस्कोया प्रतिनिधि याको दु तौइं यल महानगरपालिकाया मेयर चिरिबाबु महर्जन व नेपाःया निंतिंभारतीय दूतावासया नियोग उपप्रमुख डा. राकेश पाण्डेया उपस्थितिइ धातुपट्टिका व आधिकारिक प्रमाणपत्र जेष्ठ वर्ण महाविहार उपभोक्ता समितियात हस्ता–न्तरण याःगु खः । ज्याझ्वलय् स्थानीय समुदाय, इन्डियन नेसनल ट्रष्ट फर आर्ट एन्ड कल्चरल हेरिटेज (इन्ट्याक) या प्रतिनिधि, सम्पदा संरक्षणविद् व नेपाः सरकारया अधिकारीपिसं ब्वति काःगु खः ।

जेष्ठवर्ण महाविहार संरक्षण नेपाःया सांस्कृति सम्पदा क्षेत्रय् भुखाय् लिपा क्षति जूगु खःसा उकिया पुनर्निर्माणया निंतिं भारत सरकारं ग्वाहालि याःगु खः । पुनर्निर्माणया निंतिं भारत सरकारं प्राविधक विशेषज्ञता व परियोजना व्यवस्थापन यायेगु निंतिं परामर्शदाताया रुपय् भारतया इन्ट्याकयात नियुक्त याःगु खः । पुनर्निर्माणया उलेज्या भारतीय राजदूत नवीन श्रीवास्तवं २०८० चैत ९ गते यानादीगु खः ।

थुगु संरक्षण परियोजनायात युनेस्कों अनुकरणीय समुदाय केन्द्रित दृष्टिकोण व जटिल ऐतिहासिक नेवाः काष्ठकला व पारम्पारिक वास्तुकला संरक्षणया आवश्यकता कथं भुखाचं सुरक्षा यायेगु कथं पुनर्निर्माण याःगु धाःगु दु ।

सांस्कृतिक सम्पदा क्षेत्र अन्तर्गत भारत सरकारं नेपाःया च्यागू जिल्लाया ३० गू सम्पदा पुनर्निर्माणय् ग्वाहालि याःगु खः । थुगु परियोजना अन्तर्गत ऐतिहासिक थाय्, प्राचीन छेँ, देगः पुनर्स्थापना, गुम्बा व धर्मशाला भिंकेगु ज्या याःगु खः । येँया जनबहाः, यलया कुमारी छेँ व जेष्ठ वर्ण महाविहार, ख्वपया जंगम मठ व सिन्धुपाल्चोकया घ्याङ गुम्बा पुनर्निर्माणय् भारतं ग्वाहालि याःगु खः ।