मौलिक नांया अध्ययन मस्यौदा प्रतिवेदनय् सहलह व अन्तरक्रिया
येँ (नेपालभाषा टाइम्स) – येँ महानगरपालिकाया थीथी वडाया महत्वं जाःगु थाय्बाय्या मौलिक नांया अध्ययनयात कयाः तयार याःगु मस्यौदा प्रतिवेदनय् सहलह व अन्तरक्रिया जूगु दु । येँ महानगरपालिका सम्पदा तथा पर्यटन विभागया आर्थिक ग्वाहालिइ एकीकृत सहरी विकास केन्द्र (ऋक्ष्ग्म्)सम्पन्न याःगु ‘धार्मिक, सांस्कृतिक व ऐतिहासिक महत्वय् आधारित थाय्या मौलिक व प्राचीन नांया अध्ययन’ कार्य अन्तर्गत उगु ज्याझ्वः जूगु खः ।
वंगु असार १५ गते सोमवाः जूगु सहलह व अन्तरक्रिया ज्याझ्वलय् अनुसन्धानया झ्वलय् येँ महानगरपालिकाया १२, १३, १४, १५, २१, २३, २७ व २८ यानाः च्यागू वडाया धार्मिक, सांस्कृतिक, भाषिक, भौगोलिक व ऐतिहासिकलिसे स्वापू दुगु वडाया नां संकलन याःगु खः । थ्व अवधिइ थप मौलिक नां नं प्राप्त जूगु ज्याझ्वलय् जानकारी बिउगु खः ।
येँ महानगरपालिका सम्पदा तथा पर्यटन समितिया संयोजकलिसें ८ वडाअध्यक्ष आशामान संगत, सम्पदा तथा पर्यटन समितिया सचिवलिसें सम्पदा तथा पर्यटन विभागया प्रमुख कुमारी राई, १५ वडाया जनप्रतिनिधि, विभागया कर्मचारी, मेमेगु विभागया कर्मचारी, विज्ञ, सरोकारवाला निकाय, पत्रकारतय् सहभागिताय् प्राप्त सुझावं प्रतिवेदनयात अझ परिष्कृत यायेत ग्वाहालि याइगु विश्वास प्वंकूगु दु ।
उगु इलय् सम्पदा तथा पर्यटन समितिया संयोजक लिसें ८ वडाअध्यक्ष संगतं येँ महानगरपालिकाया म्हगस धइगु हे येँ देय्या मौलिक म्हसीकाया संरक्षण व पुनःस्थापना यायेगु खँ न्ह्यथनादिसें अध्ययनपाखें प्राप्त मौलिक नां व प्राचीन नांयात छसिकथं पुनःस्थापना याना यंकेगु प्रतिवद्धता प्वंकादिल ।
मौलिक नांया अध्ययन मस्यौदा प्रतिवेदनयात कयाः केन्द्रया कार्यक्रम प्रबन्धकलिसें परियोजना टिम लिडर यशमान कर्माचार्यं प्रस्तुति बियादीगु खः । अध्यनकथं च्यागू वडा दुने ३०६ गू मौलिक नां प्राप्त जूगु दुसा उकी ५० गू स्वयां अप्वः मौलिक नां लोप जुइगु अवस्थाय् थ्यंगु जानकारी बिउगु दु । गुलिखे मौलिक थाय्बाय्या नां तकं कायेगु (उच्चारण यायेगु) त्वःता हयेधुंकूगु अवस्था दु ।
दसुया निंतिं १२ वडाया ध्याचलखु, नख्यः गल्ली, देय्क्वय् (तेखुबुँ), छ्यंगूपाः, दुकुचा ख्यः, लुक्चा गाः, १३ वडाया करः खुसि, लत्को चपाः, लाजब्व, ध्वंपुखू, १४ वडाया न्हय्पंखा, अख्वात, बैद्यनी घाट, १५ वडाया खुपालि ख्यः, लुँधः, झ्वाक गाः, २१ वडाय् देय्क्वः वडा २३ य् दफ्टर, पुलांभंसां वडा २७ य् झंगःथकुं हिति, चि कुथि, लाभालुँछेँ, तू क्यब, २८ वडाया न्हूपुखू, तिंख्यः, क्वय्बुँ, तग्वःल्वहं बकुलाः बुँ आदि खः ।
केया कार्यकारी निर्देशक रिजा जोशीं लसकुस यासें ज्याझ्वःया म्हसीका, उद्देश्य बारे जानकारी बियादीगु खः । ज्याझ्वलय् नेपालभाषा एकेदेमिया चान्सलर मल्ल के. सुन्दर, डा. सोमप्रसाद खतिवडा, लिपि व भाषविज्ञपिं शरद कसाः, अनिल स्थापित, पौभाः साय्मि लगायतया उपस्थिति दुगु खः ।
LEAVE YOUR COMMENTS