मचा सीगु खँय् भारतयात कुटनीतिक नोट

येँ (नेपालभाषा टाइम्स)÷महाकाली खुसि पारी तावाघाट–लिपुलेक सतक तब्या यायेत बम मुइकूबलय् तिंन्हुया वःगु ल्वहँतं कयाः नेपाःया छम्ह मचा सीगु घटनायात कयाः नेपालं भारतयात कुटनीतिक नोट छ्वःगु दु । येँय् च्वंगु भारतीय दूतावास मार्फत परराष्ट्र मन्त्रालयं म्हिगः भारतयात कुटनीतिक नोट छ्वःगु खः । उगु घटनाय् लानाः नेपाःया पवन महरा नांयाम्ह मचा सीगु खः ।

गृह मन्त्रालयं कुटनीतिक नोट छ्वयेत परराष्ट्र मन्त्रालययात म्हीग शनिवाः हे पौ च्वःगु खःसां घटनाया विस्तृत विवरण मवःगु धासें म्हिगः जक कुटनीतिक नोट छ्वयागु खँ मन्त्रालयं धाःगु दु ।

कुटनीतिक नोटय् पीडितयात उचित राहत व क्षतिपूर्ति बीत इनाप यानातःगु दु । लिसें अन्तर्राष्ट्रिय सिमानाय् छुं नं कथंया गतिविधि यायेबलय् नेपाःया पक्ष व सम्बन्धित स्थानीय प्रशासन व स्थानीय जनतायात नं इलय् हे जानकारी बीमाःगु खँ नं स्मरण यानातःगु दु ।

थ्वहे झ्वलय् मचा सीगु खँय् भारतीय पक्षं माफी फ्वंगु दु । भारतीय सतक निर्माण कम्पनी गर्ग एन्ड गर्गं घटनाय् थःपिनिगु गल्ती स्वीकार यासें सीम्हेसिया छेँजःपिंत १० लाख तका भारु बीगु खँ धाःगु दु ।