लुम्बिनी विकास कोषय् गैरबौद्ध नियुक्तीया विरोध

येँ – लुम्बिनी विकास कोषय् गैरबौद्धयात सदस्य सचिव नियुक्त यायेवं विरोध सुरु जूगु दु । आदिवासी जनजाति महासंघ, नेवाः देय् दबू लिसें नेपाल बौद्ध महासंघ, तमु ह्युल छोँज धीँ, नेपाल शेर्पा संघ, वालुङ उत्थान समाजं मंकाः विज्ञप्ति जारी यासें गैर बौद्धयात सदस्य सचिव नियुक्त याःगु विरोध यासें आन्दोलनया ख्याच्वः बिउगु खः ।

वंगु बिहिवाः च्वंगु मन्त्रिपरिषद्या बैठकं ब्रम्हु जातियाम्ह गैरबौद्ध धर्मावलम्बी विष्णु ढकालयात लुम्बिनी विकास कोषया सदस्य सचिव नियुक्त यायेगु निर्णय याःगु खः । अथेहे कार्यसमितिया यक्व पदाधिकारीत नं गैर बौद्ध नियुक्त याःगु धासें विरोध जूगु खः ।

वक्तव्य गैर बौद्ध ढकालयात विकास कोषय् नियुक्त यानाः सरकारं धार्मिक सांस्कृतिक आक्रमण याःगु खँ धयादीगु दु । सरकारया थज्याःगु ज्यां राज्यं हाकनं छक्वः पञ्चायतकालीन छगू जाति, छगू धर्म व संस्कृतियात ह्वयेकेगु कुतः यानाच्वंगु द्वपं बिउगु दु ।

थ्वयां न्ह्यव लुम्बिनी विकास कोषय् न्ह्याबलें बौद्ध धर्म सम्बन्धी विज्ञ विद्वानपिंत सदस्य सचिवय् नियुक्त यायेगु याना वयाच्वंगु खः ।
विज्ञप्तिइ ढकालया नियुक्ती तुरुन्त लित कायेत इनाप यासें मखुसा आन्दोलनय् कुहां वनेगु बाहेक मेगु विकल्प मदइगु खँ धयातःगु दु ।