जलहरी काण्डय् सेनायाके बयान

येँ – अख्तियार दुरुपयोग अनुसन्धान आयोगं पशुपतिनाथ देगलय् लँुया जलहरी तःगु इलय् जूगु अनियमितता बारे छानविनयनितिं नेपाली सेनाया ग्वाहालि काइगु जूगु दु । अख्तियारं जलहरी दयेकेगु व तयेगु झ्वलय् खटे जूपिं सैनिकतय्के बयान कायेगु तयारी यानाच्वंगु दु ।

अख्तियारया कथं लुँया जलहरी दयेकेगु व उकियात गर्भगृहय् तयेगु झ्वलय् सेनायात सुरक्षाया जिम्मा बिउगु खःसा ज्या क्वचायेधुंकाः तयार याःगु मुचुल्काय् ल्हाःचिं तःपिं सेनायात बयान कायेगु तयारी यानाच्वंगु खः । सेनायात जवानतय्के न्यनेकने यायेगु नितिं रक्षा मन्त्रालयय् पत्राचार यायेगु निर्णय नं अख्तियारं याःगु दु ।

पशुपति क्षेत्र विकास कोषं २०७७ साल माघ १४ गते जलहरी दयेकेगु झ्वलय् नेपाली सेनायात सुरक्षाया जिम्मा बीगु निर्णय याःगु खः । अख्तियारं सेनायात साक्षीया रुपय् जक बयान कायेत्यंगु खँ नं अख्तियारं धाःगु दु ।

जलहरी निर्माणया ज्याय् सेनाया सुरक्षा बाहेक मेगु खँय् संलग्न मजूगु खँ नं अख्तियारं धाःगु दु । तर अथे खःसां नं अन जूगु ज्याया प्रत्याक्षीदर्शी जूगु कारणं सेनाया बयानं अनिमियतता बारे पूवंक अनुसन्धान यायेत ग्वाहालि जुइगु जुयाः सेनाया बयान कायेत्यंगु खँ धाःगु दु ।