येँ महानगरया संस्कृति, बाजं संरक्षणयात झिगू बुँदे घोषणापत्र
येँ (नेपालभाषा टाइम्स) – नेवाः देय् दबू येँ महानगर समितिया ग्वसालय् ‘नेवाः संस्कृति, परम्परा व सांस्कृतिक बाजंया संरक्षण’ विषयय्नि न्हुयंकंया विशेष प्रशिक्षण व अभिमुखिकरण ज्याझ्वः टिस्टुङय् जुल । तालिमया झ्वलय् जूगु पुचः सहलहं पिहांवःगु निष्कर्षया आधारय् झिगू बुँदाया टिष्टुङ घोषणापत्र नं जारी याःगु दु ।
घोषणापत्रय् येँ महानगरया फुक्क वडा व त्वालय् नेवाः संस्कृति संरक्षण अभियान सघन रुपं न्ह्याकेगु, वइगु दच्छिया दुने महानगरया थीथी क्षेत्रय् म्होतिं नं झिगू संस्कृति सम्बन्धी तालिम व अभिमुखीकरण ज्याझ्वः यायेगु, नेवाः भाय्, संस्कृति, परम्परागत बाजं, नखःचखः व ऐतिहासिक सम्पदालिसे ल्याय्म्ह व विद्यार्थीपिंत स्वायेगु विशेष अभियान न्ह्याकेगु, धिमे, खिं, नाभय्खिं, भुस्याः, काहाः, बाँसुरी थेंज्याःगु परम्परागत व मौलिक बाजागाजाया संरक्षण व स्यनेगु ज्यायात निरन्तरता बीगु, येँ महानगर दुनेया ऐतिहासिक सम्पदा, विहार , देगः, बहाः, बही, फल्चा, सतः पुखू व सांस्कृतिक स्थलया अध्ययन व संरक्षण अभियान न्ह्याकेगु, न्हियान्हिथंया जीवनय् नेपालभाषाया छ्यलाबुला अप्वयेकेगु, च्वयेगु, ब्वनेगु व स्यनेगु कथं भाषा हस्तान्तरणया ज्याखँ न्ह्याकेगु, लोपोन्मुख संस्कृति, परम्परा, लोकगीत, वाद्यवादन, पर्व व मौखिक इतिहासया दस्तावेजीकरण यायेगु, संस्कृति व परम्परा संरक्षणया निंतिं मिसा व ल्याय्म्हतय्त नेतृत्व क्षमता विकासया निंतिं विशेष ज्याझ्वः यायेगु, स्वनिगः व जःखःया आदिवासी नेवाः वस्ती दथुइ सांस्कृतिक भ्रमण, अध्ययन व अनुभव आदानप्रदान ज्याझ्वः याये गु, येँ महानगर समिति सम्बद्ध फुक्क वडा समितियात थःथःगु क्षेत्रय् रचनात्मक सांस्कृतिक संरक्षणया ज्या यायेत प्रेरित यानाः सक्रिय याये गु खँ न्ह्यथनातःगु दु ।
देय् दबू येँ महानगर समिति अन्तर्गतया थीथी वडा समितिया ७५ म्ह प्रतिनिधितय्सं ब्वति काःगु उगु ज्याझ्वलय् प्रशिक्षणया लिसें टिष्टुङ क्षेत्रया ऐतिहासिक सम्पदाया अध्ययन भ्रमण नं याःगु खः । ज्याझ्वलय् नेपालभाषा केन्द्रीय विभागया प्रमुख सहप्राध्यापक डा. राजनलाल जोशीं नेवाः संस्कृति व परम्पराया ऐतिहासिक पक्ष व उकिया संरक्षणया आवश्यकतायात कयाः प्रशिक्षणबियादीगु खः । अथेहे वरिष्ठ बाजंगुरु धर्म मुनिकारं सांस्कृतिक बाजंया महत्व व उकिया मौलिकता ल्यंकातयेगु उपाय बारे व्यावहारिक प्रशिक्षण बियादीगु खः ।
ज्याझ्वलय् नेवाः देय् दबूया केन्द्रीय उपाध्यक्ष उमेश स्थापितं नेवाः संस्कृति, परम्परा व बाजागाजाया संरक्षणया नितिं देय् दबूपाखें देय्न्यंक म्हिताच्वंगु भूमिकाया बारे कनादीगु खः । ज्याझ्वः संयोजक लिसें नेवाः देय् दबू काठमाडौं महानगर समितिया नायः अरविन्द्र मान सिंहं ज्याझ्वः अतिकं उत्पादनशील व सफल जूगु खँ धयादिल । वय्कःया कथं ज्याझ्वलय् ब्वति काःपिंत प्यंगू पुचलय् ब्वथलाः नेवाः संस्कृति, परम्परा व बाजागाजाया संरक्षणय् व्यक्तिगत व संस्थागत रुपं छु छु भूमिका म्हिते माः धयागु विषयय् पुचः पुचः दयेकाः सहलह जूगु खः ।
ज्याझ्वलय् तिस्तुङया ऐतिहासिक पृष्ठभूमि व सांस्कृतिक महत्वयात कयाः नेवाः अभियन्तालिसें नेवाः मुक्ति मोर्चाया लिउनायः इन्द्रबहादुर श्रेष्ठं विस्तृत जानकारीमूलक प्रस्तुति बियादीगु खःसा लसकुस न्वचू देय् दबू थाहा नगरया निराजन गोपालीं बियादीगु खः ।
LEAVE YOUR COMMENTS