न्हापांगु मातृभाषा (राष्ट्रभाषा) पत्रकारिता सम्मेलन — येँ घोषणापत्र

नेपालय् न्हापांखुसी २६ गू आदिवासी जनजाति पत्रकारतय् सहभागिताय् ‘संघीय संरचनाय् संचार— मातृभाषा पत्रकारिताया आधार’ धइगु मूल नारालिसें नेवाः पत्रकार राष्ट्रिय दबुलिं नेपाल आदवासी जनजाति पत्रकार महासंघ (फोनिज) लिसे संयोजन यानाः ने.सं. ११३८ अनलाथ्व पारु (सन् २०१८ मई १६)या न्हिकुन्हु नेपाल पर्यटन बोर्ड, येँय् ग्वसाः ग्वःगु मातृभाषा (राष्ट्रभाषा) पत्रकारिता सम्मेलनया जिपिं सहभागिपिं,

नेपालय् वंगु ९३ दँ न्ह्यवंनिसें निरन्तरता कया वयाच्वंगु मातृभाषा पत्रकारिताया लहर वइगु दिनय् थप सशक्त याना यंकेमाःगु आवश्यकता अनुभव यासें, करिब छगू शताब्दी ताःहाकःगु मातृभाषा पत्रकारिता राज्यया मिखाय् सकारात्मक संरक्षकत्व, प्रोत्साहन, प्राथमिकताया विषयवस्तु जुइ मफुगु कारण परिपक्व, सुविधायुक्त, उर्बर व विकसित जुइमफुगु तथ्ययात आत्मसात् यासें,

बहुजातीय, बहुभाषिक व बहुधार्मिक संघीय लोकतान्त्रिक गणतन्त्रात्मक संरचनाय् दुहां वनेगु धुंकूगु नेपाःयात समावेशी, सहभागितामूलक व लोकतान्त्रिक मूल्यमान्यताय् आधारित जातीय विविधां युक्त जीवन्त राष्ट्रया रुपय् न्ह्यःने न्ह्याकेत संचारमाध्यम पूर्ण समावेशी जुइमाःगु व उकिया महत्वपूर्ण आधारया रुपय् आदिवासी जनजाति समुदाय दथुइ अभ्यासया रुपय् दुगु मातृभाषा पत्रकारितायात थप सशक्त, उपलब्धिमूलक, व्यावसायिक व सिर्जनशील दयेकेत बहुभाषिक पत्रकारिताया निंतिं समावेशी संचार नीतिया अविलम्ब कार्यान्वयन यासें क्वय् न्ह्यथनाकथंया पलाः न्ह्याकेमाःगु निष्कर्षय् थ्यनागु दु ः

# नेपाली संचार जगतय् आदिवासी जनजाति पत्रकारिताया न्यून उपस्थितियात नीति निर्माण तहं समस्याया रुपय् आत्मसात् यायेमाःगु व उकिया समाधानया निंतिं बहुआयामिक सकारात्मक पहल न्ह्यःने न्ह्याकेमाःगु,

# हाल गोरखापत्र न्हिपतिं अभ्यास याना वयाच्वंगु बहुभाषिक पत्रकारितायात समावेशी पत्रकारिताया छगू नमूनाया रुपय् कयाः प्रत्येक प्रदेशया जनसंख्या, भाषा, सांस्कृतिक बाहुल्यताया लिधंसाय् मातृभाषी संचारकःमितय्गु सक्रिय सहभागिता सुनिश्चित यायेगुया नापं सरकारी संचारमाध्यमय् मातृभाषा पत्रकारिता याना वयाच्वंपिं जनशक्तिया पेशागत सुनिश्चितता कायम यायेमाःगु,

# नीति निर्माण तहय् आदिवासी जनजाति पत्रकारया प्रतिनिधित्व सुनिश्चित यायेमाःगु,

# नेपाली संचारमाध्यमया अन्तरवस्तुइ नेपाःया विविधता प्रतिविम्बित जुइमाःगु व उकिया निंतिं समाचारकक्षय् आदिवासी जनजाति समुदायया समानुपातिक प्रतिनिधित्व जुइमाःगु,

# गैर मातृभाषी संचार क्षेत्रय् संलग्न आदिवासी जनजाति संचारकःमितय्त थ्व क्षेत्रय् परिचालित जुइत प्रोत्साहित व आकर्षित यायेमाःगु,

# जनजाति संचारकःमिया क्षमता विकासया निंतिं आवश्यक ज्याझ्वःत संचालन यायेमाःगु

# पत्रकारितायात समानाता व सामाजिक न्याय, पहिचानया निंतिं आदिवासी जनजातिं याना वयाच्वंगु आन्दोलनयात अभिन्न अंगया रुपय् आत्मसात यायेमाःगु

# आदिवासी जनजाति संचार पहलया निंतिं विशेष सुविधा व प्रोत्साहनया व्यवस्था जुइमाःगु,

# राज्यं समानुपातिक व समानताया लिधंसाय् अनुदान वितरण प्रणाली संचालन यायेमाःगु

# राज्यं राष्ट्रियस्तरय् प्रत्येक दँय् मातृभाषा पत्रकारिता दिवस ग्वसाः ग्वयेमाःगु ।

मातृभाषा पत्रकारिताया विकासं प्रेस व अभिव्यक्ति स्वतन्त्रताया उच्च्तम अभ्यास याकीगु व नेपाली पत्रकारिताया परिभाषायात व्यापकता बीगु जूगुलिं आमसंचारय् सकसिगुं पहुँच सुनिश्चितता यायेत थन न्ह्यथनातःगु बुँदात कार्यान्वयनय् हयेत सम्वद्ध निकाययात आव्हान यानाच्वना ।

सम्बन्धित बुखँ

LEAVE YOUR COMMENTS