तबः समाजया ज्याथःजिथि हना

येँ(नेपालभाषा टाइम्स)- तबः (ताम्राकार) समाजं जंक्व पुलेधुंकूपिं समाजया ज्याथःजिथिपिंत हनेज्या याःगु दु । तबः समुदायया दिगुख्यः लाजिम्पातय् च्वंगु कैलाशचौरय् उगु हनाज्याझ्वः याःगु खः ।

ताम्राकारतय् ख्वातुगु वस्ती दुगु मरु व महाबूया ख्वीप्यम्ह ज्याथःजिथियात हनेज्या याःगु खः । ज्याझ्वलय् ९६ दँ दुम्ह ज्याथः व ९९ दँ या जिथिया नं उपस्थिति दुगु खः ।

वय्कःपिंत नेवाः मौलिक परम्पराकथं समाजया मिसा पुचलं ख्यें सगं बिउगु खःसा दोसल्ला न्ययेकाः हनापौलिसें बुद्ध मूर्ति उपहार बियाः हनेज्या याःगु खः । समाजया पदाधिकारीपिं नायः सुर्यरत्न ताम्राकार, न्वकु प्रवेशमान ताम्राकार, मूछ्याञ्जे दिनेश ताम्राकार, छ्याञ्जे निरजमान ताम्राकार, दांभरिं सरजु ताम्राकारलिसें ज्यासना पुचःया दुजःपिंसं हनेज्या यानादीगु खः ।

थःपिनि दुगुद्यःया पुजा यासें न्ह्याःगु ज्याझ्वलय् समाजया नायः ताम्राकारं लसकुस यानादीगु खः । ज्याझ्वः लिपा सकसितं तबः भ्वय् नं नकूगु खः । उगु इलय् उदाय समाजया थीथी गुंगू कवःया नायः, छ्याञ्जेलिसें प्रतिनिधिया सहभगिता दुगुु खः ।

सम्बन्धित बुखँ

LEAVE YOUR COMMENTS