नकली शरणार्थी प्रकरणय् एमाले अन्यौल

येँ (नेपालभाषा टाइम्स)- नेकपा एमाले संसदीय दलया बैठकय् नक्कली भुटानी शरणार्थी प्रकरणय् सांसदतय्सं चिउताः प्वंकूगु दु । बैठकय् सांसदतय् चिउताःयात कयाः लिसः बिसें एमाले अध्यक्ष केपी शर्मा ओलीं नक्कली भुटानी शरणार्थी प्रकरणय् दुथ्याःपिं पार्टीया सुयातं नं संरक्षण मबीगु व अनुसन्धानय् पूर्ण रुपं ग्वाहालि यायेगु खँ धयादीगु खः ।

बैठकय् न्ववासें अध्यक्ष ओलीं धयादिल, ‘झीसं कानुनी ल्याखं जुइगु अनुसन्धानय् ग्वाहालि यायेगु जुइ । तर छानबिनया झ्वलय् गुगुं नं कथंया पर्वाग्रह मतयेमा, छानबिन पारदर्शी व तथ्यपरक जुइमाः, राजनीतिक आग्रहं मुक्त जुइमाः ।’

उकथं नेकपा एकीकृत समाजवादी पार्टीया अध्यक्ष माधव नेपालं नक्कली भुटानी शरणार्थी प्रकरणय् ल्हाः दुपिंत कारबाही यायेत तुति खाके मजिउ धयादीगु दु । म्हिगः विराटनगर विमानस्थलय् पत्रकारतलिसे खँ ल्हासें वय्कलं उगु खँ धयादीगु खः ।

वय्कलं घटनाय् ल्हाः दुपिं फुकसितं कारबाही जुइमाः धासें सरकारं दोषीयात बचे यायेत वइगु उच्च दबाबया न्ह्यःने झुके जुइ मजिउ धकाः नं बः बियादिल । थ्वहे झ्वलय् म्हिगः प्रतिनिधिसभाया बैठकय् नं एमाले व माओवादीया सांसदतय्सं नक्कली शरणार्थी प्रकरणय् दुथ्याःम्ह सांसद लिसें पुलांम्ह प्रधानमन्त्री टोपबहादुर रायमाझीयात कानुनी दायराय् हयेत इनाप याःगु दु ।

एमालेया प्रमुख सचेतक पदम गिरी, सचेतक महेश बर्तौला व सांसद सूर्य थापां थुकिया नापनापं मेमेगु भ्रष्टाचार सम्बन्धी काण्डया नं छानविन जुइमाः धकाः माग यानादिल ।

थ्व प्रकरणय् देउवाया कलाः आरजु देउवां नं ध्यबा काःगु धकाः नां स्वाना वःगु दु । मेख देशय् जुयाच्वंगु थपाय्धंगु प्रकरणय् विपक्षी पार्टी रास्वपा व राप्रपां धाःसा आः तक प्रतिक्रिया मबिउगु खँय् नं सर्वसाधारणं टिप्पणी याना हःगु दु ।