आवश्यकता स्वयाः प्राथमिकता बिया वनेगु जुइ

चुनावय् छिगु मू एजेन्डा छु खः ?
स्थानीय चुनावय् शिक्षा, स्वास्थ्य, रोजगारीलिसें भाषा, कला, संस्कृति, परम्पराया निंतिं विशेष व्यवस्था यायेगु योजना दयेकागु दु । न्हापाया कार्यकालय् थुकियात विशेष प्राथमिकता बियागु खःसा आः नं प्राथमिकता बियागु दु । प्राथमिकता जक बियागु मखु, न्हापा यानागु ज्यायात व्यापक याना यंकेगु योजना दु । व हे कथं न्ह्याः वनेगु नापं रोजगारीया समस्या न्हंकेगु, कला, संस्कृति परम्परायात ख्यलय् नं विशेषकथं ज्या यायेगु योजना दु ।

वडाय् मुख्य समस्यात छु छु दु ?
—समस्या मदुगु वडा धइगु हे दइमखु, समस्या न्ह्याबलें दयाच्वनी । उकियात समाधान याना वनेगु मुख्य खँ खः । अथे खयाः नं वडाय् खने दुगु मुख्य समस्या धइगु त्वनेगु लःया आपूर्ति, धःया उचित व्यवस्थापन, सतकया समस्या, वडाया कार्यक्षेत्रय् लाःगु खुसिया सुचुकुचु, वडावासीया सही तथ्यांक संकलन, विपद् व्यवस्थापन खः । अथे हे वडावासीया स्वास्थ्यया समुचित परीक्षणया व्यवस्था, सतक मस्त, फुटपाथया व्यवस्थापन नं यायेमाःगु दुसा वडाय् शान्ति सुरक्षा कायम यायेमाःगु चुनौति नं दु । अथे हे लागू वासःया दुरुपयोग नं उतिकं जुयाच्वंगु दुसा आः निर्वाचित जुल धाःसा मुख्यकथं खनेदुगु थ्व समस्या समाधानया निंतिं कुतः याना वनेगु जुइ ।

छि निर्वाचित जुयादी धइगु आधार छु दु ?
थ्व स्वयां न्ह्यःया कार्यकालय् गुलि नं ज्या यानाः उकी जिं वडावासीया मन त्याके फुगु खना । वडावासीपिंसं गुगु विश्वास यानाः जितः वडाअध्यक्षय् निर्वाचित यानादिल । वय्कःपिनिगु विश्वासयात जिं त्याके फुगु तायेका । वडावासीया मन त्याकाः गुगु ज्या जिं यानाः उकिया हे लिधंसाय् हाकनं छक्वः वडावासीया सेवा यायेगु ह्वःताः बियादी धइगु जितः विश्वास दु । लिसें न्हापा गुकथं वडावासीया मन त्याकाः ज्या यानाः व स्वयां अप्वः आः यायेगु नापं न्हापा याये मफुगु ज्या न्ह्याकेगु जुइ ।

आः हाकनं निर्वाचित जुयादिल धाःसा दकलय् न्हापां छुकियात प्राथमिकता बियादी ?
निर्वाचित जुइवं दकलय् न्हापां थ्व ज्या याये धकाः प्राथमिकता बियागु मदु । ज्याया आवश्यकता स्वयाः उकियात प्राथमिकता बिया वनेगु जुइ । छु आवश्यक खः, गुगु महत्वपूर्ण जू, वडावासीया निंतिं आवश्यक जुइगु योजनायात प्राथमिकता बियाः ज्या याना वनेगु जुइ । अथे खःसां वइगु न्यादँया निंतिं धकाः छगू कार्ययोजना नं दयेकागु दु । आवश्यकताया लिधंसाय् प्राथमिकता बियाः ज्या यायेगु योजना दु ।

न्यादँया कार्यकालप्रति गुलि सन्तुष्ट जुयादिया ?
कोरोना भाइरसया संक्रमण न्यना वंगु व उकिया रोकथामया निंतिं तयातःगु लकडाउनया इलय् ताःलाक्क हे वडावासीयात सेवा बियागु दु । कोरोना संक्रमित जूपिंत आवश्यक उपचारया व्यवस्था यानाः इमिगु जीवन बचे याये खना सन्तुष्ट जू । कोरोनाया कारणं स्वास्थ्योपचारया समस्या जूपिंत आवश्यकता व प्राथमिकता बियाः सेवा बी फुगु हे तःधंगु सन्तुष्टि खः ।
अथे हे विपन्न वर्गयात इमिगु आवश्यककथं पारिश्रमिक इनेगु, अति आवश्यक थासय् मर्मत, पुनःनिर्माण आदि ज्या जुल । थुकी जि सन्तुष्ट हे जुया । समग्रय् न्यादँया दुने गुलि नं ज्या जुल, उकी सन्तुष्ट हे दु । उकिसनं यानागु ज्या न्यादँया दुने सम्पन्न याये खंगु हे तःधंगु सन्तुष्टि खः ।

स्थानीय भाषा, कला, संस्कृतिया उत्थानया निंतिं छु यायेगु योजना दु ?
स्थानीय भाषा, कला, संस्कृतिया उत्थानया निंतिं न्हापा नं यानागु हे खः । आः नं यायेगु जुइ । न्हापा यायेधुन आः थ्व ख्यलय् छुं यायेम्वाःल धइगु जुइमखु । थ्व झीगु म्हसीका खः थुकिया निंतिं न्ह्याबलें न्ह्यचिला च्वनेगु जुइ । भाषा, कला, संस्कृतिया उत्थानया निंतिं वइगु दिनय् गृहिणी, मिसा, ज्येष्ठ नागरिक जक मखु, आः विद्यार्थीलिसें त्वाः त्वालय्, थीथी क्लब, संघसंस्थायात नं आवश्यक कथं शिक्षण व प्रशिक्षणया व्यवस्था याना वनेगु जुइ ।

सम्बन्धित बुखँ

LEAVE YOUR COMMENTS