चालक हडतालं पेट्रोलय् लाइन

येँ – पेट्रालियम पदार्थ ढुवानी याइपिं चालकतय्सं आन्दोलन याःगुलिं स्वनिगःया थीथी पेट्रोल पम्पय् लाइन सुरु जूगु दु । चालक हडतालं यानाः वंगु स्वन्हु न्ह्यवंनिसें भारतं पेट्रोलियम पदार्थ नेपाः वयाच्वंगु मदु, गुकिया हुनिं पेट्रोलियम पदार्थ अभाव जूगु आशंकां पेट्रोल पम्पय् सवारी साधनया लाइन सुरु जूगु खः ।

तर चालकतय् आन्दोलन छु संस्थां यानाच्वंगु खः धइगु खँ धाःसा सीमदुनि । पेट्रोलियम ढुवानी संघं थःपिंसं आन्दोलन यानागु मखु धयाच्वंगु दुसा नेपाल यातायात मजदुर संघं नं आन्दोलनय् थःपिनिगु उपस्थिति मदुगु खँ धासें आन्दोलनय् घुसपैठ जूगु आशंका याःगु दु ।

संघया अध्यक्ष भीम राई ‘ज्वालां’ थ्व आन्दोलनया औचित्य मदु धासें अपराध संहिताय् छुं हिउपाः हःगु खःसां नं चालकत आँटे चायेमाःगु आवश्यक मदु धयादीगु दु । न्हूगु अपराध संहिताय् यदि गाडीं क्यलाः मनू सित धाःसा स्वदँ निसें झिदँ तक कैद जुइ धयातःगुलिं चालकत आन्दोलनय् कुहां वःगु खँ धाःगु दु ।

थ्वहे झ्वलय् म्हिगः आयल निगमं छगू सुचं पिकासें ढुवानी व्यवसायी व चालकतय्सं पेट्रोलियम पदार्थ ढुवानी यायेगु ज्याय् ग्वाहालि मयात धाःसा सम्झौता त्वाःथलाः उमिगु लाइसेन्स समेत खारेज यायेगु ख्याच्वः बिउगु दु ।