पञ्जरां नखःयात कयाः अन्तर्क्रिया

ख्वप – नेपालमण्डलया नेवाः बौद्ध धर्मावलम्बितय् तःजिगु पञ्जरां नखःयात कयाः अन्तर्क्रिया ज्याझ्वः जुल । नेपाल परम्परागत बौद्ध धर्म संघ, ख्वप कचा, सम्यक महादान व्यवस्थापन समिति व नेवाः पत्रकार राष्ट्रिय दबू ख्वप कचाया मंकाः ग्वसालय् उगु अन्तक्र्रिया जूगु खः ।

दँय्दसं गुंलागा त्रयोदशिकुन्हु तःजिक न्यायेकीगु पञ्जरां नेपालमण्डलया नेवाः बौद्ध धर्मावलम्बि जक मखसे हिन्दूतय्सं नं उतिकं महत्वपूर्ण पर्वया रुपय् हनेगु याना वयाच्वंगुलिं थ्व दिंयात दान दिवसया रुपय् हनेमाःगु खँय् बः बिउगु दु। पञ्जरांयात दानया यायेगु दिंया रुपय् तःधंगु महत्व बिया वयाच्वंगु व दान यायेगु अभ्यासयात प्रवर्द्धन यायेत वृहत रुपं थ्व नखः हनेमाःगु खँय् सरोकारवालातय्सं बः बिउगु दु ।

ज्याझ्वलय् बौद्ध विद्वान पुष्परत्न शाक्यं बौद्ध धर्मय् पञ्जरां कुन्हु दान यात धाःसां उकिं गज्याःगु फल वा पुण्य प्राप्त जुइ धइगु बारे जानकारी बियादीगु खः । वय्कलं महायान बौद्ध धर्मकथं बुद्ध जुइत आवश्यक गुण धर्मय् दकलय् न्हापां दान वइगु जूगुलिं बौद्ध चर्याया न्हापांगु अभ्यासया रुपय् थ्व परम्परा न्ह्याना वयाच्वंगु धयादिल ।

मेम्ह बौद्ध विद्वान शान्तरत्न वज्राचार्यं ख्वपय् पञ्जरां न्यायेकगु चलन द्वःछि दँ स्वयां नं पुलां जूसां राष्ट्रिय व अन्तर्राष्ट्रिय रुपय् उकिया प्रचार जुइ मफुगुलिं पञ्जरांयात राष्ट्रिय पर्वया रुपय् हे हनेमाःगु खँय् बः बियादिल ।

ज्याझ्वलय नेपाल पत्रकार महासंघ ख्वप कचाया अध्यक्ष पुष्कर बुढाथोकी, दबूया केन्द्रीय अध्यक्ष श्रीकृष्ण महर्जन, दबूया ख्वप शाखाया अध्यक्ष रामगोपाल तमखुं नं पञ्जरां पर्वया महत्वयात कयाः नुगःखँ तयादीगु खः ।