एमालेया झिक्वःगु महाधिवेशनया प्रतिनिधि चयनय् अनियमितता जूगु खुलासा
येँ – नेकपा (एमाले)या थ्यंमथ्यं ८ लाख संगठित सदस्यपाखें १ हजार ९ सय ९९ म्ह महाधिवेशन प्रतिनिधिमध्ये आपाः धइथे ल्ययेगु ज्यायात सर्वसम्मत याये धुंकूगु दु । छुं छुं जिल्लाय् बिहीवाः व शुक्रवाः हे सर्वसम्मतरूपं प्रतिनिधि ल्ययेगु ज्या क्वचायेकूगु खः ।
एमालेया झिक्वःगु महाधिवेशनया नेतृत्व चयनया निंतिं प्रतिनिधि ल्ययेगु ज्याया झ्वलय् स्थानीय तहनिसें दक्वं कमिटीइ केन्द्रीयता हाबी जूगु अधिकांश संगठित दुजःपिनिगु धापू दु ।
वइगु मंसिर १० निसें १२ गते तक चितवनय् जुइगु झिक्वःगु महाधिवेशनया निंतिं ल्यःपिं १ हजार ९ सय ९९ प्रतिनिधिं पार्टीया मूल नेतृत्व नापं केन्द्रीय कमिटी दुजःपिं निर्वाचित याइगु खः ।
महाधिवेशन प्रतिनिधि ल्यज्या दक्वं सर्वसम्मतं यायेगु निर्देशन बिउगु व मातहतया कमिटीं नं थुकियात हे कार्यान्वयन याःबलय् केन्द्रीयता हाबी जूगु काठमाडौं उपत्यका युथ फोर्स कमाण्डर एवं नेकपा एमाले काठमाडौं महानगर प्रतिनिधि परिषद् दुजः उद्धव
खड्गीं धयादिल ।
पार्टीया एकता क्यनेमाःगु बाध्यता क्यनाः यकःति निर्णय यायेत स्वःगु धासें १० औं महाधिवेशनया निंतिं काठमाडौँ क्षेत्र नं ८ प्रतिनिधि ल्यज्या सम्बन्धय् अन्तर पार्टी निर्देशन बमोजिम जनवादी अभ्यासया छुं नं प्रकृया नालामकाःगु खड्गीं खुलासा यानादिल ।
‘प्रतिनिधि ल्यःबलय् निश्चित व्यक्तिजक च्वनाः माइन्युट तयार याःगु खँ जानकारी वःगु दु । निर्वाचन कमिटी मदयेकुसे ल्यज्याया हकयात कुण्ठित यानाः १०–१५ व्यक्तितय्सं जक ल्यःपिं तथाकथित प्रतिनिधितय्त जिमिसं विरोध यानाच्वना’,खड्गीं धयादीगु दु ।
अथे हे राष्ट्रिय युवा संघ नेपालया केन्द्रीय सदस्य निशार उद्दिनं अलोकतान्त्रिक व विधि मगाःगु निर्णय स्वीकार मयायेगु खँ धयादिल । ‘विधिसम्मत प्रक्रियां निर्वाचन यानाः जिपिं पार्टीया दुजःतय्गु लोकतान्त्रिक हित रक्षाया निंतिं अविलम्ब तथाकथित प्रक्रिया दिकाः जनवादी निर्वाचनया विधिपाखें प्रतिनिधि ल्यज्याया व्यवस्था यायेमाः ।’, उद्दिनं धयादिल, ‘अवान्छित रुपय् ज्या याइपिं याकीपिं व्यक्तितय्त माःगुकथंया कारबाहिया निंतिं अधिकांश संगठित दुजःतय्गु माग जुयाच्वंगु दु ।’
पार्टी संकटय् लानाच्वंगु व एमाले दुने एकता ल्यनाच्वंगु दनि धकाः क्यनेमाःगु बाध्यतायात ध्यानय् तयाः हाई कमान्डं प्रतिनिधि ल्यज्याया लागिं सर्वसम्मत तरिका नालेमाःगु निर्देशन बिउगु खः ।
केन्द्रीय कार्यालय सचिव शेरबहादुर तामाङं बिहीवाः सनिलं सुरु जूगु प्रतिनिधि ल्यज्या प्रक्रिया शनिवाःतकया दुने अधिकांश थासय् सर्वसम्मत ढंगं ल्यज्या जुइ धुंकूगु जानकारी बियादीगु दु ।
LEAVE YOUR COMMENTS