कुमारि माजुं बहीद्यः स्वयाबिज्यात
येँ(नेपालभाषा टाइम्स)÷जीवित देवी कुमारि माजुं बहीद्यः स्वयाबिज्याःगु दु । गुंलाया इलय् बहीद्यः स्वयेगु छगू परम्परा खः । थ्व झ्वलय् जीवित देवी कुमारि माजुयात इतुंबहालय् बिज्याकाः बहीद्यः दर्शन याकूगु खः ।
बहीद्यः स्वयेत कुमारि माजुयात इतुंबहालय् बिज्याकूगु इलय् इतुंबहाःया स्थानीयलिसें आपालं भक्तजनतय्सं तःजिक लसकुस याःगु खः । वसपोलयात कुमारि छेँया चिताइदारं इतुंबहालय् बही स्वयेत बिज्याकूगु खः ।
उगु इलय् इतुंबहाःस्थित केशचन्द्र आजु ब्वयेगु पाःलाः खलःयापिंसं लुखाय् हे वसपोलयात तःजिक लसकुस यासें दुचायेकूगु खः । अनंकुमारि माजुयात वसन्तपूस्थित कुमारि छेँय् नं इतुंबहाःतक खतय् तयाः बिज्याकूगु खःसा अनंलि वसपोलयात बुयाः बहीद्यःया दर्शन याकूगु खः । उगु इलय् कुमारि माजुयात श्रद्धालुतय्सं मरिचरि, सिसाबुसा, दक्षिणा नं छाःगु खः ।
थुकथं हे बहीद्यः स्वयेत बिज्याःम्ह वसपोल कुमारि माजुयात इतुंबहालय् च्वंगु केशचन्द्र आजुया जीवनीलिसे स्वापू दुगु बिलंपौ नं दर्शन याकूगु खः । अनंलि केशचन्द्र आजुया दर्शन लिपा वसपोलं श्वेतवर्ण धर्मचक्र महाशान्त ताराया नं दर्शन यानाबिज्याःगु खः ।
अनं लिपा वसपोलयात थँबहीस्थित भगवान बहालय् चकंद्यः, छुस्याबहालय् नं बिज्याकाः बहीद्यः दर्शन याकूगु खः ।
LEAVE YOUR COMMENTS