नेपालभाषा मिसा खलःया मिसा हिंसा सम्बन्धय् चेतनामूलक ज्याझ्वः
येँ (नेपालभाषा टाइम्स)÷ नेपालभाषा मिसा खलःया ग्वसालय् थनया जगतसुन्दर ब्वनेकुथिइ मिसा हिंसा विरुद्ध १६ न्हुया अभियान ज्याझ्वः अन्तर्गत ‘मिसा व लैंगिक हिंसा न्हंकेगु’ बारे छगू ज्याझ्वः जुल ।
मिसा खलःया नकिं धर्मशोभा तुलाधरया सभापतित्वय् जूगु उगु ज्याझ्वलय् येँमपा १५ वडाया वडासदस्य मैंयालक्ष्मी महर्जन मूपाहां कथं झायादीगु खः । ज्याझ्वलय् खलःया निवर्तमान नकिं मंगला कारञ्जितं मिसा हिंसा धयागु छु खः, थुकियात छाय् न्हंकेमाः, मिसा हिंसाविरुद्ध गुबलें निसें आन्दोलन जुल धयागु खँया जानकारी बियादीगु खःसा मूपाहां महर्जनं मिसा हिंसा न्हंकेमाः धइगु खँय् बः बियाः थःगु नुगः खँ तयादीगु खः ।
ब्वनेकुथिया प्रधानध्यापिका सुनिता मानन्धरं मिसा हिंसाबारे मस्तय्त ध्वाथुक जानकारी बिसें छेँय्छेँय् मिसा मस्त व मिजं मस्तय्त समान व्यवहार याः कि मयाः धकाः मस्तय्के न्यनादिल ।
खलःया छ्याञ्जे प्रेमहिरा तुलाधरं लसकुस यानाः न्ह्याःगु उगु ज्याझ्लय् मिसा खलःया जःपिं, जगातसुन्दर ब्वनेकुथिया विद्यार्थीलिसें शिक्षिकापिंसं ब्वति काःगु खः ।
LEAVE YOUR COMMENTS