ख्वपय् सम्यकया तयारी

ख्वप(नेपालभाषा टाइम्स)- दँय्दसं माघ १ गते घ्यःचाकु संल्हूकुन्हु न्यायेका वयाच्वंगु सम्यकया तयारी लिपांगु चरणय् थ्यंगु दु । माघ १ गते घ्यःचाकु संल्हूकुन्हु दँय्दसं थन बौद्ध परम्पराया अतिकं महत्वं जाःगु सम्यक न्यायेकेगु याना वयाच्वंगु दु ।

ख्वप नगरपालिका वडा नं. १ जयकीर्ति महाविहार (थथुबही) स्थित भुइख्यलय् बौद्ध परम्पराकथं सम्यक महादान पर्व न्यायेकेगु याना वयाच्वंगु दु । थन न्यायेकीगु सम्यक महादान अन्तर्गत संघ भोजनदानया पाः थुगुसी चतुर्ब्रम्ह महाविहार अन्तर्गतया तःधिछेँ खलः’या सप्तचन्द्र वज्राचार्यया पाः लानाच्वंगु दु । थुकिया निंतिं छवाः न्ह्यःनिसें हे वय्कःया छेँजःपिं महाविहारय् हे च्वनाः सम्यक महादानया निंतिं माःगु सकतां व्यस्थापन यायेगु ज्याय् व्यस्त जुयाच्वनादीगु दु ।

तःधिछेँ खलःया ज्येष्ठताया क्रमकथं दँय्दसं सम्यक महादान पर्व संचालन यायेगु पाः कयाः न्ह्याका वयाच्वंगु दु । पाः लाःगु छेँजःपिंसं भोजन दानलिसें गुथिलिसे सम्बन्धित दक्वं ज्याया जिम्मेवारी कयाः व्यवस्थापन यायेमाः ।

थथुबहिलिइ जुइगु सम्यक महादानय् महाविहार परिसरया भुइख्यलय् चतुब्र्रम्ह महाविहार संघ कुलदेवता श्री हेबज्र नैरात्मायात दकलय् न्हापां भोजन दान यानाः वयांलिपा छसिकथं मू दिपंकर, बहाःछेँ दिपंकर, झौरबही दिपंकर, थथुबही दिपंकर व कुथुबही दिपंकरयात भोजन दान यायेगु चलन दु । अनंलि नापं छसिकथं बिज्याकातःपिं प्यम्ह सम्यक द्यः, सुवर्ण चैत्य, स्थवीर आजु, मूल गुरुजु, गुरुजु व अनंलि झ्वःलिक च्वनाच्वंपिं वज्राचार्य, बुद्धाचार्य व शाक्य कुलयापिंत सम्यक दान यायेगु ज्या जुइ ।

सम्यक महादानय् ग्वःमाय्, ग्वःमू, कःसू, तुयुगु मुस्या, मस्यां, क्वलः, भुति, इकं, मिचः, म्हुकं, चिम्हुकं, घ्यःचाकु, आम्लि, अम्बः, खय्पि, चय्पि, पंचपकवान, चतांमरि, तु, धौ, दुरु, मरिचरि, मसलालिसें मेमेगु नं आपालं ज्वलंत सम्यक महादानया इलय् दान यायेगु याइ ।

सम्बन्धित बुखँ

LEAVE YOUR COMMENTS