मोहनी लिपा संक्रमण तच्वइगु ख्याच्वः

येँ (नेपालभाषा टाइम्स) – नेपालय्को रोना भाइरसया संक्रमण आः झन तच्वया वनीगु खँ जनस्वास्थ्य विज्ञतय्सं धाःगु दु। मोहनि नखः लिपा संक्रमण झन तच्वया वनीगु धापू विज्ञतय् दु ।

संक्रामक ल्वय् विशेषज्ञ डा. अनुप सुवेदीं आः नेपालय् चिकुला सुरु जुइगु लिसें मोहनि नखःया झ्वलय् मनूत उखेथुखे जुयाः वइगु जूगुलिं संक्रमण तच्वया वइगु व स्थिति भयावह खनेदइगु खँ धयादीगु दु । नेपालय् वंगु असोज २४ गते निसें न्हिं द्वःछिं मल्याक मनूतय्के संक्रमण खने दयाच्वंगु खः । तर एकादशि कुन्हु धाःसा मुक्कं ५७० म्हेसित जक संक्रमण खनेदत । थथे छक्वलं म्हो खनेदुगु पिसिआर परीक्षण हे म्हो जूगुलिं खः । डा. सुवेदीं नं परीक्षण म्हो जुइगुलिं छन्हु निन्हु अझं म्हो जक संक्रमण खनेदुसां मोहनि लिपा मनू हाकनं थःथःगु ज्याय् लिहां वयेगु सुरु जुइवं संक्रमण नं तच्वया वइगु खँ धयादीगु दु। वय्कःया कथं आः चिकुला सुरु जुया वयेवं न्हि च्याद्वःझिद्वः नं संक्रमितत खनेदयेफु ।

नेपालय् कोरोना संक्रमणया न्हापांगु लहर हे नियन्त्रणय् मवःनिगुलि कारणं नं आः झन हे स्थिति भयावह जुइफुगु धापू वयेकःया दु। वय्कलं थुकिया निंतिं आः राज्य व नागरिक निगुलिं पक्ष उतिकं जिम्मेवार जुयाः सचेत जुइमाःगु सुझाव नं बियादीगु दु ।

थ्वहे दथुइ नेपालय् बुधवाः न्हिछिया दुने थप १९५४ म्हेसित कोरोना संक्रमण जूगु पुष्टि जूगु दु। स्वास्थ्य तथा जनसंख्या मन्त्रालयया कथं बुधवाः जक कोरोनाया कारणं थप झिंछम्हेसिया ज्यान वंगु दु। थुकिया लिसें नेपालय् कोरोना सीपिनि ल्याः ८८७ म्ह थ्यंगु दुसा कोरोना संक्रमिततय् ल्याः १ लाख ६२ हजार ३५४ म्ह थ्यंगु दु । बुधवाः संक्रमित जूपिं मध्ये ८४३ म्ह स्वनिगःयापिं लाःगु दु । थुकी येँय् ६९६ म्ह, यलय् ११८ म्ह व ख्वपय् २९ म्हेसित संक्रमण पुष्टि जूगु खः ।