भारतं नेपालय् लुँ तस्करी जुइगु सम्भावना अप्वल
येँ (नेपालभाषा टाइम्स)÷भारत सरकारं बजेटपाखें हे लुँइ कया वयाच्वंगु कर म्हो यायेवं आः भारतं नेपालय् लुँ तस्करी जुइ फइगु सम्भावना अप्वयावंगु खँ व्यवसायीतय्सं धाःगु दु । भारतय् थ्व स्वयां न्ह्यः लुँइ १५ प्रतिशत कर कायेगु यानाच्वंगु खः । आः न्हूगु बजेटय् ९ प्रतिशत कर क्वपालाः ६ प्रतिशत जक यायेवंं भारतं नेपालय् लुँ तस्करी अप्वयेफुगु खँ नेपाल सुनचाँदी व्यवसायी महासंघया महासचिव किरण भाई बज्राचार्यं कनादीगु दु ।
वय्कःया कथं लुँइ कयाच्वंगु कर म्हो यायेवं भारतय् लुँ तोलां १५ हजार तक दनी, अथे जुइबलय् लुँया तस्करी अप्वइगु सम्भावना दुगु खँ धासे वय्कलंं धयादिल, ‘छतोला लुँया भावय् १६ हजार पायेवं १ किलो लुँ तस्करी यायेबलय् १२ निसें १३ लाख तका पाइ । १ किलोय् उलिमछि पाइगु अवस्थाय् तस्करत प्रोत्साहित जुइगु स्वभाविक खः ।’ थुकियात कयाः थःपिंसंं म्हिगः हे अर्थमन्त्री बिष्णु पौडेलयात जानकारी याकागु खँ कनादिसें उबलय् मन्त्री पौडेलं याकनं हे कर समायोजना यायेगु आश्वासन बियादीगु खँ कनादिल ।
अर्थमन्त्री पौडेलयात सरकारं लुँइ कया वयाच्वंगु कर तत्काल समायोजन मयात धाःसा भारतं लुँ तस्करी अप्वइगु जुयाः याकनं थुकी ध्यान बीत इनाप यानागु खँ कनादिसें म्हिगः येँया त्रिभुवन अन्तर्राष्ट्रिय विमानस्थलय् विमान दुर्घटना जूगुलिं अर्थमन्त्रीलिसे बांलाक खँ धाःसा जुइ मफुगु खँ कनादिल ।
थ्वहे दथुइ नेपालय् वंगु आर्थिक दँय् दछिया दुने २३०० किलो जक लुँ खपत जूगु तथ्यांक पिदंगु दु । नेपाल राष्ट्र बैंकया तथ्यांकय् नेपालय् लुँ आयात म्हो जूगु क्यनातःगु दु । अन्तर्राष्ट्रिय बजारय् लुँया भाः निरन्तर थहां वंगुलिं यानाः नेपालय् लुँ न्याइपिं म्हो जूगुलिं लुँ आयात नं म्हो जूगु खँ नेपाल सुनचाँदी व्यवसायी महासंघया पुलांम्ह अध्यक्ष तेजरत्न शाक्यं कनादिल । वय्कःया कथं सरकारी कोटां हे दँय् ७३०० किलो तक लुँ आयात यायेदुगु खःसां नं लुँया भाः निरन्तर थहां वंगुलिं लुँ न्याइपिं म्हो जुयाः लुँ आयात नं म्हो जूगु खः ।
वय्कलं धयादिल, ‘छखे लुँया भाः निरन्तर थहां वनाच्वंगु दु । मेखे नेपाःमिया खर्च यायेगु क्षमता नं ह्रास जुयाच्वंगु दु । अथे जुयाः थौंकन्हय् खास हे लुँया व्यापार मदु हे धाःसां जिउ ।’
LEAVE YOUR COMMENTS