दुर्गालालया थ्व कविता

ज्यापु ! थ्व यःमरि जिं स्वय् छंगु
फुस्लु घमण्ड जकं खः ला ?
छ्यं प्वंलिसे प्वाः तग्वै धाःगु
खःथें खःथें च्वन दः ला !

जनकवि दुर्गालाल श्रेष्ठं च्वयादीगु थ्व कविता म्हिगःनिसें सामाजिक सञ्जालय् भाइरल जुयाः चाःहिलाच्वंगु दु । दँय्दसं यःमरि पुन्हि कुन्हु न्यायेकीगु ज्यापु दिवसयात व्यंग्य यासें च्वयातःगु थ्व कविता वय्कलं छाय् च्वयादिल धइगु खँ नं चर्चाय् वयाच्वंगु दु ।

सूत्रतय्सं धाःकथं ज्यापु दिवस कुन्हु जुइगु मू ज्याझ्वः खस भासं सञ्चालन याइगु खँय् असन्तुष्टि प्वंकुसें जनकवि श्रेष्ठं थ्व कविता चिनादीगु खः । सीदु कथं ज्यापु संस्कृति विकास कोषं थुगुसी ज्यापु दिवसया लसताय् जनकवि दुर्गालाल श्रेष्ठयात नं हनेगु प्रस्ताव छ्वःगु खः । तर जनकवि श्रेष्ठं खस भासं ज्याझ्वः सञ्चालन यायेगु खःसा अज्याःगु सम्मान थम्हं ग्रहण मयायेगु खँ धयाछ्वःगु खँ सीदुगु दु ।