लिपि गुथिया ३९ क्वःगु बुन्हि

येँ – नेपाल लिपि गुथिं ३९ क्वःगु बुन्हि छगू ज्याझ्वःया दथुइ हन । लिपि गुथिया थःगु हे छेँ साःननि, त्यरय् गुथिया नायः निरञ्जन तबःया सभापतित्वय् जूगु खः । गुथिया न्वकु अनिल स्थापितं गुथिं आतक याना वयाच्वंगु थीथी गतिविधिया बारे जानकारी बियादीगु खः ।

ज्याझ्वलय् लसकुस यासें वय्कलं स्वनिगःया थीथी थासय् नेवाः बस्तीइ वनाः बाःछिइ छक्वः न्ह्यका वयाच्वनागु ‘क्यालिजात्रा’ तसकं सफल जुयाच्वंगु व वइगु दिनय् नं उकियात निरन्तरता बिया वनेगु जुइ धासें स्वनिगलं पिने नं थुकथंया ज्याझ्वः ज्वना वनेगु ग्वसाः दुगु जानकारी बियादिल ।

लिसें वय्कलं गुथिया ग्वसालय् आतक क्यालिजात्रा न्ह्याका वयाच्वनागु थासय् थ्व हे वइगु असार ७ गते लिपि नखः यायेत्यनागु नं जानकारी बियादिल । ज्याझ्वलय् मूवक्ताकथं झायादीम्ह लिपि अन्वेषक नापं खोज व अनुसन्धानकर्ता काशिनाथ तमोटं थःगु लिपिया महत्व, उकिया छ्यलाबुला व इतिहासया बारे नुगःखँ तयादीगु खः ।

अथे हे मेम्ह पाहां भाषिक न्ह्यलुवालिसें साहित्यकार नापं अन्तर क्याम्पस नेपालभाषा साहित्य पालाःया संस्थापक नायः हितकरवीरसिंह कंसाकारं नेपाल लिपि गुथिया आधिकारिक वेबसाइट सार्वजनिक यानादिल । ज्याझ्वलय् नेपालभाषाया संकिपा ख्यःया नांजाःम्ह कलाकार आशाकाजी थकुं नेपाल लिपि (रञ्जना) च्वयेगु तरिका बारे कनादीगु खःसा नेपाल लिपि नं च्वयाः क्यनादीगु खः ।

ज्याझ्वलय् गुथिया पुलांपिं नायः, साहित्यकार पुष्पराज राजकर्णिकार, पुरातत्व विभागया अधिकृत शौभाग्य प्रधानांग, यल मंकाः खलःया पुलांम्ह नायः सुरेश प्रधान, लिपि गुथिपाखें स्वनातःगु सिरपाःया दाता पद्मधर तुलाधर, येँ मनपा २७ वडा नायः चिनियामान वज्राचार्य, येँ मनपा २५ वडा नायः नीलकाजी शाक्य लगायत आपालं साहित्यकार, कलाकार, भाषाह्यमि व लिपि ह्यमिपिनिगु उपस्थिति दुगु खः।