वैशाख ६ व ७ य् क्यानया विशेष साधारण सभा

येँ – नेपाल क्रिकेट संघ (क्यान)या विशेष साधारण सभा थ्वहे वैशाख ६ व ७ गते येँय् जुइगु जूगु दु । अन्तर्राष्ट्रिय क्रिकेट परिषद् (आइसीसी)या प्रतिनिधि व राष्ट्रिय खेलकूद परिषद (राखेप)या प्रतिनिधितय् उपस्थितिइ विशेष साधारण सभां पारित यायेवं क्यानया न्हूगु विधान वइ । विधान अनुमोदनया निंतिं थ्व निक्वःगु विशेष साधारण सभा जुइत्यंगु खः ।

विधान पारित जुइवं क्यानया निर्वाचन याकेगु निंतिं मनिटरिङ कमिटी गठन जुइ । मनिटरिङ कमिटीं क्यानया चुनाव याकाः न्हूगु नेतृत्व ल्यइ । मनिटरिङ कमिटीइ आइसिसीया स्वम्ह, राखेप व निर्वाचित क्यानया छम्ह छम्ह प्रतिनिधि दुजः कथं च्वनी । वि.सं. २०७२ मंसिरय् चतुरबहादुर चन्द अध्यक्षय् निर्वाचित जूगु खः । क्यानटा तत्कालिन अध्यक्ष टंक आङबुहाङया पुचलं उगु अधिवेशन दिकेत राष्ट्रिय खेलकूद परिषद्य् उजुरी तःगु खः ।

राखेपं निष्पक्ष व वैधानिक तरिकां निर्वाचन मजू धासें रमेश सिलवालया नेतृत्वय् तदर्थ समिति गठन याःगु खः ।थ्व लिपा क्यानय् निष्पक्ष निर्वाचन मजूगु व सरकारी हस्ताक्षेप जूगु धासें आइसिसीं २०७३ वैशाखं निसें क्यानयात निलम्बन यानाबिउगु खः ।

आइसिसी बोर्ड बैठक स्वयां न्ह्यः आः विधान संशोधन यायेत साधारण सभा यायेत्यंगु खँ क्यानया अध्यक्ष चतुरबहादुर चन्दं धयादीगु दु । क्रिकेटया विवाद समाधानया निंतिं व्यापक दबाब जुइवं क्यानया निर्वाचित कमिटीं विधान संशोधनया निंतिं साधारण सभा यायेत्यंगु खः । क्यानं विधान संशोधन यात धाःसा आइसिसी निलम्बन फुकुवा यायेगु खँ धायेधुंकूगु दु ।

सम्बन्धित बुखँ

LEAVE YOUR COMMENTS