ने. सं. ११४४ कौलाथ्व चौथी -

निक्वःगु हलिं नेवाः न्ह्यसःलिसः कासाया उलेज्या

येँ(नेपालभाषा टाइम्स)- वल्र्ड नेवाः अर्गनाइजेसन (डब्लुएनओ)या ग्वसालय् वइगु शनिवाःनिसे निक्वःगु हलिं नेवाः न्ह्यसःलिसः कासा न्ह्याइगु जूगु दु । डब्लुएनओया ग्वसालय् जुइगु निक्वःगु हलिं नेवाः न्ह्यसः लिसः कासाया उलेज्या वंगु शनिवाः थनया जगतसुन्दर ब्वनेकुथिइ छगू ज्याझ्वःया दथुइ जूगु खः ।

डब्लुएनओया केन्द्रीय नायः संयुक्त श्रेष्ठया सभापतित्वय् जूगु ज्याझ्वलय् मूपाहं नेवाः न्ह्यलुवालिसें वरिष्ठ साहित्यकार व शिक्षाविद् हितकरवीर सिंह कसालं त्वाःदेवाय् मत च्याकाः उलेज्या यानादीगु खः । ज्याझ्वलय् नवासें मू पाहां कसालं झीगु जाति व भाय् झीगु नेपाः देय् नाप स्वानाच्वंगु दु धासें अबलय् राणा व पंचायती सरकारं झीगु भाषा, कला, जाति, तजिलजि, संस्कार स्यंकेगु ज्या याःगु खः धयादिल ।

झीगु भाय् नेपालभाषा खः, नेवारी मखु धइगु खँय् बः बियादिसें थौं नेपाली भाय् धयाच्वंगुयात पंचायत स्वयां न्ह्यः खस्, पर्वते व गोर्खा भाय् धाइगु खः धयादिल । झीगु भाय् नेपालभाषायात नेपाःया भाय्या रुपय् म्हसीका बीबलय् इमिगु भाय् ध्याकुनय् लाइगु व थःपिं क्वय् लाइगु तायेकाः हे अबलय्या राज्यसत्तां इमिगु भाय्यात नेपाली धकाः प्रचार यानाः झीगु भाय्यात नेवारी धायेगु याःगु खः धयादिल ।

नेपालभाषा धालकि नेवाःया पहिचान च्वनीगु जुयाः तत्कालीन राज्यसत्ताय् च्वंपिंसं थःगु भाय्यात नेपाली याःगु व नेवारी धइगु अशुद्ध खः। झीसं गबलें नं झीगु भाय्यात नेवारी धाइमखु, धयाच्वनागु नंं मदु धयादिल ।

डब्लुएनओया केन्द्रीय न्वकु समिर महर्जनं लसकुस यानादीगु ज्याझ्वलय् साहित्यिक एम्बेसडर राजभाई जकःमिं चिनाखँ न्यंकादीगु खःसा पाहांकथं झायादीपिं केन्द्रीय न्वकु शाक्य सुरेन, जगतसुन्दर ब्वनेकुथिया प्रिन्सिपल सुनिता मानन्धर, सल्लाहकार सुरेश प्रधान, नेवाः गुथि न्यूयोर्कया नायः विजयमान सिंह, कवयित्री प्रतिसरा साय्मि, न्ह्यसः लिसः कासाया कजि समन्त वज्राचार्यं नुगःखँ कनादीगु खः ।
ज्याझ्वलय् न्ह्यसः लिसः निर्माण कमिटीया कजि केशरमान ताम्राकारं कासाया नियम बारे जानकारी बियादीगु खः ।

तगिं खुगूनिसें १२ गू तकया ब्वँमिपिनि दथुइ जुइगु कासाय् नेपाःलिसें थीथी देशया नीस्वंगू पुचलं ब्वति कयाच्वंगु दु । वइगु शनिवाःनिसें भदौ १६ तक न्हापांगु चरणया कासा जुइ । अनंलि न्हापांगु चरणय् न्हाप लिउ लाःगु पुचःया दथुइ निगूगु चरणया कासा असोज १३ निसें कात्तिक ४ तक, निगूगु चरणया न्हाप व लिउ लाःगु पुचःया दथुइ स्वंगूगु चरणया कासा कात्तिक ११ व १८ य् व स्वंगू चरणय् न्हाप व लिउ लाःगु पुचःया दथुइ कात्तिक २५ गते बिजं कासा जुइ ।

कासाय् न्हापयात १०००, लिउयात ८००, लियांलिउयात ६०० व प्यंगूगु थासय् लाःगु पुचःयात ४०० अमेरिकी डलरया सिरपाःया व्यवस्था यानातःगु दु । अथे हे प्रत्येक समूह चरणया कासाय् विजयी टिमयात ८० अमेरिकी डलर बीगु डब्लुएनओं जानकारी बिउगु दु ।