स्वनिगलय् स्थानीय तहलं पिसिआर परीक्षण व ट्रेसिङया दायरा तब्याकीगु

येँ – स्वनिगलय् स्थानीय तहलं पिसिआर परीक्षण व कन्ट्याक्ट ट्रसिङया दायर अप्वयेकीगु जूगु दु । स्वनिगलय् समुदायस्तरय् हे कोरोना संक्रमण जुइफुगु खतरायात ध्यानय्त याः उपत्यका नगरपालिका फोरमं फुक्कं पालिकाय् कन्ट्याक्ट ट्रेसिङ व टेस्टिङया दायरया तब्या यायेगु क्वःछिउगु खः ।

फोरमया नायः येँ महानगरपालिकाया मेयर विद्या सुन्दर शाक्य, न्वकु यल महानगरपालिकाया मेयर चिरिबाबु महर्जन व महासचिव थिमि नगरपालिकाया मेयर मदनसुन्दर श्रेष्ठ दथुइ थौं गम्भीर सहलह ब्याकुसें स्वनिगया फुक्कं पालिकाय् कन्ट्याक्ट ट्रेसिङ तब्याका यंकाः २० हजार पिसिआर परीक्षण यायेगु क्वःछिउगु खः ।

स्वनिगलय् कोरोना संक्रमिततय् ल्याः न्हियान्हिथं अप्वया वनाच्वंगु खँ धासें येँ महानगरपालिकाया मेयर शाक्यं धयादिल, ‘स्वनिगः घनाबस्ती जूगुलिं थन समुदायस्तरय् कोरोना संक्रमण न्यनावन धाःसा भयावह स्थिति वयेफु । उकिं इलय् हे नियन्त्रणया निंतिं फुक्कं पालिकातय्सं एकीकृत योजना दयेकाः न्ह्याः वनेत्यनागु खः ।’

वय्कलं आः जारी जुयाच्वंगु निषेधाज्ञाया ईयात सदुपयोग यानाः व्यापक रुपं कन्ट्याक्ट ट्रेसिङ यानाः परीक्षणया दायरया तब्याकेगु निर्णय जूगु व पोजिटिभ जूपिंत उपचारया व्यवस्था यायेगु बारे सहलह जूगु खँ कनादिल । वय्कलं थुकिया बारे निर्णय यायेगु निंतिं कन्हय् (सोमवाः) फोरमया बैठक सःतातयागु जानकारी नं बियादीगु दु ।

फोरमया महासचिव मदनसुन्दर श्रेष्ठं १५ निसें २० हजार कन्ट्याक्ट ट्रेसिङ यायेगु योजना दुगु व कन्हय् जुइगु फोरमया बैठकं गुगु पालिकाय् गुबलय्, गुगु क्षेत्रय्, गुलि कन्ट्याक्ट ट्रेसिङ यायेगु व परीक्षण यायेगु धयागु बारे निर्णय जुइगु खँ धयादिल ।

फोरमया पदाधिकारीतय् बैठक न्ह्यः विज्ञतलिसे नं सहलह याःगु खः । सहलहय् स्वास्थ्य मन्त्रालयया जनस्वास्थ्य सल्लाहकार डा. खेम कार्की, मन्त्रालयया हे प्रमुख विशेषज्ञ महेन्द्रप्रसाद श्रेष्ठ, स्वास्थ्य सेवा विभागया इपिडिमियोलोजी तथा रोग नियन्त्रण महाशाखाया निर्देशक डा. बासुदेव पाण्डेपिं दुथ्याःगु खः ।

सम्बन्धित बुखँ

LEAVE YOUR COMMENTS