लुम्बिनी विकास कोषया ७७ करोड ५५ लख बजेट पारित
लुम्बिनी, (रासस)- लुम्बिनी विकास कोषया परिषद् बैठकं आर्थिक दँ २०८१÷८२ या बजेट पारित याःगु दु । कोषया नायः संस्कृति, पर्यटन व नागरिक उड्डयनमन्त्री बद्रीप्रसाद पाण्डेया अध्यक्षताय् च्वंगु परिषद् बैठकं बजेट पारित याःगु खः । परिषदं ७७ करोड ५५ लाख ९२ हजारया अनुमानित बजेट पारित याःगु खः । कोषया दांभरि ढुण्डिराज भट्टराईं प्रस्ताव यानादीगु बजेटय् आन्तरिकपाखे ३२ करोड ५५ लाख ९२ हजार व सरकारपाखें ४५ करोड अनुदान यानाः उगु आम्दानी खर्चया अनुमान याःगु खः । कोषया सदस्यसचिव सानुराजा शाक्यं न्ह्यब्वयादीगु नीति व ज्याझ्वः नं पारित याःगु दु ।
थुगु बजेटं नीति व ज्याझ्वलं आय अप्वकेत दर्शनार्थीतय्गु ल्याः अप्वयेकेगु, पाल्चा मतया सेवायात अझ वृद्धि विस्तार यायेगु, उपहार, दान व चन्दा व्यवस्थापन यायेगु, सिँ लिलामं मिइगु, पार्किङ, लुम्बिनी प्रवद्र्धनात्मक सामग्री उत्पादन व वितरणय् प्राथमिकता ब्यूगु दु । व्ययपाखें लुम्बिनी
गुरुयोजनाया कार्यान्वयन, युनेस्को विश्व सम्पदा कमिटीया प्रतिवेदन कार्यान्वयन, पूर्वाधार निर्माण, तिलौराकोटयात विश्व सम्पदा सूचीइ दुथ्याकेगु व स्थानीय तहलिसेया मंकाःज्याय् व्यय यायेगु योजना प्राथमकिताय् लाः ।
बैठकय् मन्त्री पाण्डें लुम्बिनीया विकास व सुधारय् मन्त्रालय व थःगुपाखें माक्व सकारात्मक ग्वाहालि दइगु भलसा बिसें भैरहवाय् च्वंगु गौतमबुद्ध अन्तर्राष्ट्रिय विमानस्थलय् अन्तर्राष्ट्रिय उडान न्ह्याःगुलिं थुकिं लुम्बिनी व उगु लागाया पर्यटकीय ख्यलं लाभ कायेमाः धयादिल ।
बैठकय् संस्कृति, पर्यटन नापं नागरिक उड्डयन राज्यमन्त्री अरुण चौधरीं ईया सदुपयोग यानाः ज्यायात याकनं न्ह्याकेमाःगुली बः बियादिल । बैठकय् कोषया न्वकू डा ल्हारक्याल लामां लुम्बिनी विकास कोषयात अर्थ, परराष्ट्र, गृह व पर्यटन मन्त्रालयपाखें माक्व ग्वाहालि मदुगु धासें लुम्बिनी गुरुयोजना कार्यान्वयन यायेत सरकारया अनुदान मदुसां पूवंकेफइगु तर सरकारया नीतिइ उदार व्यवस्था हयेमाःगु धयादिल । बैठकं लुम्बिनीइ दयेकातःगु तर बांलाक मचाःगु बिहार, गुम्बाया अध्ययन यानाः उकिया करार प्रक्रिया व ईया पुनःमूल्याङ्कन यायेत अध्ययन कार्यदल दयेकेगु नं क्वःछिउगु खः ।
LEAVE YOUR COMMENTS