
येँ – चिनियाँ राष्ट्रपति सी चिनपिङया नेपाः भ्रमणयात प्रभावित यायेत्यंगु द्वपनय् ज्वनातःपिं दर्जनौं मनूत मध्ये फुकसितं त्वःने धुंकूगु दुसां निम्हेसिया विरुद्ध धाःसा मुद्दा दायर यायेगु तयारी जुयाच्वंगु खँ सीदुगु दु । थ्व निम्ह फ्रि तिब्बतया ध्वाँय् ज्वनाः प्रदर्शनया तयारी यानाच्वंपिं खः । थुमित प्रहरीं बौद्धं ज्वंगु खः ।
थुपिंपाखें फ्रि तिब्बतया ध्वाँय् लिसें मेमेगु ज्वलं नं बरामद याःगु खँ धाःगु दु । ज्वंपिनिगु नां सार्वजनिक याःगु मदुनि । प्रहरीं थौंकन्हय् थुमिके बयान कयाच्वंगु दुसा बयान क्वचायेवं मुद्दा तइगु खँ धाःगु दु । तर थुमित मुद्दा तयेत्यंगु खँयात देयय मानव अधिकारकर्मीतय्सं धाःसा विरोध याःगु दु ।
यदि थुपिं विरुद्ध मुद्दा तल धाःसा अन्तर्राष्ट्रिय जगतय् नेपाःया छबी अझ स्यनीगु ख्याच्वः नं उमिसं बिउगु दु । मानव अधिकारया अवस्था बारे नेपाःया छबी आः हे बांमलाःगु व थुकिं यानाः अझ स्यंकीगु खँ नं उमिसं धया हःगु दु । नेपालं ‘छगू चीन’ नीति नाला तःगु कारणं नेपाःया भूमि दुने चीन विरोधी छुं नं गतिविधि याके मबीगु जुयाः उमित ज्वंगु अनुमान याःगु दु ।
चिनियाँ राष्ट्रपतिया भ्रमण ज्याझ्वःयात प्रभावित यायेत्यंगु द्वपनय् प्रहरीं थीथी थासं मुक्कं ६० म्ह मनूतय्त ज्वंगु खः । ज्वंपिं सकसितं सामान्य न्यनेकने यानाः त्वःतूगु खःसां निम्हेसिया विरुद्ध धाःसा मुद्दा तयेत्यंगु खः । चीनं बिसिउँ वयाच्वंपिं तिब्बती शरणार्थीत नेपाःया थीथी थासय् च्वंगु १२ गू शिविरय् च्वनाच्वंगु दु । थुमिगु ल्याः नेपालय् १२ द्वः ति दयेमाःगु अनुमान दु ।
LEAVE YOUR COMMENTS