रासस समाचार उत्पादनया ‘इपिसेन्टर’ खः – सञ्चारमन्त्री

येँ (रासस)- सञ्चार व सूचना प्रविधि मन्त्री पृथ्वीसुब्बा गुरुङं राष्ट्रिय समाचार समिति (रासस) राष्ट्रिय व अन्तर्राष्ट्रिय समाचार उत्पादनया इपिसेन्टर (केन्द्रविन्दू) जूगु धयादीगु दु । रासस नापया अन्तर्वार्ताया झ्वलय् थौं मन्त्री गुरुङं समाचार सेवाया जिम्मेवारी दिपाः मकासें क्वबिया वयाच्वंगु राससं फुक्क मिडियातय्त ल्वयेक समाचार सम्प्रेषण याये आवश्यक जूगु धासें संस्थागत क्षमता अप्वयेकेत व ‘इन हाउस’ य् छुं न छुं कथंया सुधार नं याना यंकेत सुझाव बियादिल ।

“लिपांगु इलय् सञ्चारगृह सूचना प्रविधिमैत्री जुजुं वनाच्वंगु दु, ईयात ल्वयेक राससं थःगु गतिविधि व उत्पादन नं प्रविधिमैत्री दयेकेत बः बिइमाः” सरकारया नं प्रवक्ता जुयाच्वनादीम्ह सञ्चारमन्त्री गुरुङं धयादिल – “रासस आइटी फ्रेन्डली जुइमाः । जनशक्तिया कार्यक्षमता थकायेगुया नापनापं व्यवस्थापन सुधारय् नं ध्यान तयेमाः ।”

राससं लिपांगु इलय् चाःन्हि समाचार सेवा न्ह्याकूगु हुनिं मुक्क सञ्चार क्षेत्रय् सकारात्मक सन्देश प्रवाह जूगु थम्हेस्यां खनागु न्ह्यथसें मन्त्री गुरुङं धयादिल – “खुसिबाः व प्रकोपया इलय् राससं सूचं पित बियाः निर्वाह याःगु भूमिका च्वछायेबह जू, सेवा बीगुलि राससं आः दिपा काइमखु धयागु ज्यां हे पुष्टि जूगु दु । सरकारया तातुना नं सुचनय् जनताया पहुँच फयांफक्व विस्तार यायेगु खः ।” सेवा विस्तार जूगु थें राससं व हे कथं जनशक्तिया कार्यक्षमता नं अप्वयेका यंकेमाःगुली बः बिसें मन्त्री गुरुङं राष्ट्रपति, प्रधानमन्त्री, संवैधानिक निकाय व राष्ट्र निर्माणया जिम्मेवारी कयाच्वंपि प्रमुखतयत सःता राससपाखें धारणा सम्प्रेषण याना यंकेमाःगु दु धयादिल ।

संघीय मन्त्रालयं यानावयाच्वंगु ज्यायाबारे नं समाचार दयेकाः पित बीइमाःगु धासें वय्कलं धयादिल – “२२ गू मन्त्रालयं छु छु ज्या यानाच्वन धयागु जनतां सीमाः ।” राससया ज्या यायेगु शैली, नीति, रणनीति व ऐन संशोधन यायेमाःगु नं वय्कलं कुलादिल ।