मस्तय्त मांभासं शिक्षा मबीगु नीति दास दयेकेगु खः

किपू – मांभासं शिक्षा मबिसे गैर मांभासं शिक्षा बीगु ज्या जुल धाःसा उकिं मनूतय्त दास दयेकेगु ज्या जक जुइगु भाषा आयोगया अध्यक्ष डा. लवदेव अवस्थीं धयादीगु दु । निदँनिसें न्हय्दँया उमेरय् मस्तय्त इमिगु हे मांभासं शिक्षा बी फत धाःसा इमिसं बांलाक हे सयेके सीके याये फइगु वय्कलं धयादिल ।

किपू नगरपालिकाया संयोजनय् व शिक्षा आयोगया ग्वसालय् ‘शिक्षाय् मातृभाषाया प्रयोग सम्भाव्यता व स्तर पहिचानसम्बन्धी सर्वेक्षण गोष्ठि’ (नेपालभाषा) विषयय् जूगु छगू ज्याझ्वलय् वय्कलं उगु खँ धयादीगु खः । ज्याझ्वलय् नवासें उप.प्रा. सिद्धिबहादुर महर्जनं लिच्छवीकाल, मल्लकालय् आपालं ल्वहंपौ नेपालभाषां हे च्वयातःगु खने दुगु व लिपा वयाः नेवाःतय्सं ल्हाइगु भाय्यात नेवार भाषा धकाः हिस्यायेगु यायां आः वयाः नेवारी भाषा धकाः व्यापक रुपं स्यंका यंकेगु ज्या जुयाच्वंगु धासें असन्तुष्टि प्वंकादिल ।

मस्तय्त चिचीधिकःबलय् हे मांभासं शिक्षा बीत फत धाःसा उकिं याकनं इमिसं सयेका काइ धइगु मनोचिकित्सकतय् नं धापू दुगु खँ न्ह्यथँसें मस्तय्त इमिगु हे मांभासं शिक्षा बिल धाःसा याकनं थुइका काइ धइगु खँ अभिभावकतय्त नं थुइका बीमाःगु ज्याझ्वःया छम्ह वक्ता विष्णुहरी अधिकारीं धयादिल ।

प्रा.डा. चन्द्रमान वज्राचार्यं चन्द्रमाय् दकलय् न्हापां रकेट छवयेत सफल जूगु देय् रुसं मेपिनिगु भासं सयेकेसीके यानाः उगु सफलता प्राप्त याःगु मखसे थःगु हे मांभासं शिक्षा काःगुलिं सफल जूगु खः धयादिल । ‘अंग्रेजी वा मेमेगु भासय् स्यनेगु नामय् नेपालभाषा वा थःगु मांभाय् ल्वःमनीगु अवस्था वइगु शिक्षा नीति गलत खः’ वय्कलं धयादिल ।

किपू नगरपालिकाया प्रमुख रमेश महर्जनलिसें नेपालभाषा केन्द्रीय विभागया प्रमुख ओमकारेश्वर श्रेष्ठं नं नुगःखँ तयादीगु ज्याझ्वलय् प्रा.डा. तुयुबहादुर महर्जन, उप.प्रा. वज्रमुनि वज्राचार्य, उप प्रा. जीवन महर्जन लगायत शिक्षा ख्यःया आपालं व्यक्तित्वपिनिगु उपस्थिति दुगु खः ।