माइलाबाबु द्यःला नं नायः उम्मेदवार

ख्वप- नेवाः देय् दबूया आः जुइगु तःमुँज्याय् माइला बाबु द्यःलां नं अध्यक्ष पदय् उम्मेदवारी बीगु जूगु दु । शनिवाः देय् दबू ख्वप लागाया निक्वःगु दँमुँज्याय् न्ववासें भाजु द्यःलां थम्हं नं थुगुसी नायः पदय् उम्मेदवारी बीगु खँ कनादीगु खः ।

भाजु द्यःला थौंकन्हय् देय् दबूया महासचिव खःसा वय्कः निगू कार्यकाल महासचिव जुयादीधुंकूगु दु । थ्वहे वइगु चौलागा एकादशि व द्वादशि (चैत १४ व १५ गते) धरानय् देय् दबूया न्हय्क्वःगु तःमुँज्या जुइत्यंगु दु । नेवाः देय् दबूया नायः पदय् पुलांम्ह महासचिव पवित्र बज्राचार्यं नं उम्मेदवार जुइगु घोषणा यानादीधुंकूगु दु ।

नेवाः देय् दबू ख्वप कचाया दँमुँज्या वरिष्ठ साहित्यकार तिलकप्रकाश कायस्थं उलेज्या यानादीगु खः । ज्याझ्वलय् देय् दबू बागमती प्रदेशया नायः उमेश स्थापितं नेवाः एकताया आधार भाषा जूगुलिं थीथी स्थानीय निकायय् जनजातियात वइगु दांपाखें भाषा, संस्कृतिया प्रशिक्षण न्ह्याकेमाःगु खँ कनादिल । ज्याझ्वलय् नेवाः राष्ट्रिय मुक्ति मोर्चाया श्रीकृष्ण सुलू, कृष्णबहादुर घजू, सानुकान्छा आलेमगर, रामेश्वर रानामगरं भिन्तुना देछानादीगु खःसा सभापति नरेश नेवालं थीथी प्रतिवेदनत न्ह्यब्वयादीगु खः ।