सवारी दुर्घटनाया कारण मानवीय

येँ- महानगरीय ट्राफिक प्रहरी महाशाखाया ग्वसालय् सवारी दुर्घटना न्यूनीकरण सम्बन्धी छन्हुया सम्मेलन जुल ।
सम्मेलनय् नवासें येँ महानगरपालिकाया प्रमुख प्रशासकीय अधिकृत यादवप्रसाद कोइरालां प्रतिस्पर्धात्मक धंगं सवारी साधन चले याइगुलिं हे दुर्घटना नं अप्वया च्वंगु खः धासें नियम कानुनया पालना व अनुशासित जुयाः यात्रा यायेगु खःसा सवारी दुर्घटनाय् म्हो वइ धयादिल ।

ट्राफिक व्यवस्थापनया निंतिं ट्राफिक मत, आकाशे ताँ, बसस्टपया व्यवस्थापनया निंतिं येँ मनपां ज्या यानाच्वंगु वय्कलं धयादिल ।
येँ जिल्ला प्रमुख जिल्ला अधिकारी केदारनाथ शर्मां थम्हं सः सिउगु खँयात व्यवहारय् लागू याये फत धाःसां नं सवारी दुर्घटनाय् म्हो वइ धयादिल । अथे हे यातायात व्यवस्था विभागया निमित्त महानिर्देशक प्रेमकुमार सिंहं अप्वःथें दुर्घटनाया कारणं चालक स्वयम थः हे जूगुलिं, लापरवाही धंगं सवारी चले यायेगु जक म्हो जुल व उकिया पने फत धाःसां नं सवारी दुर्घटना म्हो जुइगु विश्वास प्वंकादिल ।

महानगरीय प्रहरी ज्याकूया प्रमुख लिसें प्रहरी नायब महानिरीक्षक मनोज न्यौपानें सार्वजनिक सार्वजनिक सवारी साधनय् मिसातय्त जुइगु हिंसा अप्वःगु धासें उकियात पनेत विशेष योजना दयेकाः लागू यायेत्यनागु दु धयादिल ।

ज्याझ्वलय् बिउगु जानकारीकथं देशय् जुइगु कुल दुर्घटनाया बछि स्वयां अप्वः सतक दुर्घटना स्वनिगलय् जुइगु यानाच्वंगु दु ।
चालु आर्थिक दँय् देय्न्यंकं जूगु सतक दुर्घटनाय् लानाः २,३१८ म्ह सीगु दुसा चालु आर्थिक दँया हे वंगु जेठ मसान्त तकया दुने स्वनिगलय् जक ५,७८१ दुर्घटना जूगुलिइ १६८ म्हं सीगु दुसा ४,०९९ म्ह घाःपाः जूगु महाशाखा प्रमुख बसन्तकुमार पन्तं कनादिल ।