ने. सं. ११४४ कछलागा षष्ठी -

लुम्बिनीया बौद्ध हल विवादय्

येँ – थ्वहे बुद्धजयन्तीया लसताय् लुम्बिनीइ जुइगु अन्तर्राष्ट्रिय बौद्ध सम्मेलनया लागिं दयेकूगु कन्फेरेन्स हल दयेके सिधयेवं हे विवादय् लाःगु दु ।
स्वन्हुयंकं जुइगु उगु सम्मेलनया लागिं ४ करोड तका खर्च यानाः नेपाली सेनां चांचां हे थ्व हल दयेकूगु खः । तर विवादय् लाःगुया कारण छु धायेबलय् थ्व हल दयेकूगु
थाय्या नापसं हे मेगु पक्की हल दयेकेगु धकाः सरकारं निर्णय समेत याना तयेधुंकूगु दु ।

सूत्रतय्सं धाः कथं अन २७ करोड तका खर्च यानाः पक्की हल दयेकेगु धकाः ठेकेदारयात ठेक्का समेत बीधुंकूगु दु । पक्की हल दयेकेगु धयातःगु थाय्या नापसं अज्याःगु हे मेगु अस्थायी हल दयेकूगुलिं आः अन पक्की हल दयेकेगु लाकि मदयेकेगु धकाः समेत अन्यौल पिहां वःगु दु ।
छुं जुयाः अन पक्की हल दयेकल धकाः आः दयेकूगु थ्व अस्थायी हल थुने मालीगु खँ धाःगु दु । सरकारी निकायतय् दथुइ हे समन्वय मजुयाः थथे जूगु खँ नं सूत्रं धाःगु दु ।

आः दयेकूगु थ्व अस्थायी हल स्वद्वः मनू च्वनेगु क्षमता दुगु हल खः । वहे थासय् दयेकेत्यंगु स्थायी हल न्याद्वः मनू च्वनेगु क्षमताया जुइ ।
हल दयेकूगु बारे विवाद पिहां वयेवं संस्कृति मन्त्री रविन्द्र अधिकारीं थ्व हल बौद्ध सम्मेलन यायेत स्वन्हुया लागिं दयेकूगु मखु, अन स्थायी हल मदयेकूतलेया लागिं खः धयादीगु दु ।

अन स्थायी हल दयेकेगु ज्या स्वदँया दुने सिधयेकेगु ग्वसाः याना तःगु दु । यदि इलय् ज्या मजुल धाःसा उगु हल इलय् सिमधइगु व अज्याःगु अवस्थाय् थ्वहे अस्थायी हलपाखें ज्या काये मालीगु खँ सरकारी पदाधिकारीतय्सं हे धायेगु यानाच्वंगु दु । थ्व विवादास्पद अस्थायी हलया उलेज्या राष्ट्रपतिं यानादीगु ज्याझ्वः दु ।