प्याब्सन-एनप्याब्सनं स्कूल शुल्क पुलेत धाल

येँ (नेपालभाषा टाइम्स) – निजी विद्यालय सञ्चालकपिंसं सरकारया निर्णय अःखः ‘लकडाउन’ इलय्या नं शुल्क पुलेत अभिभावकपिंत इनाप याःगु दु। निजी तथा आवासीय विद्यालय अर्गनाइजेसन (प्याब्सन) व राष्ट्रिय निजी तथा आवासीय विद्यालय एशोसिएसन (एनप्याब्सनं) म्हिगः मंकाः विज्ञप्ति पिथँसें शुल्क पुलेत अभिभावकपिंत इनाप याःगु खः ।

प्याब्सन अध्यक्ष टीकाराम पुरी व एनप्याब्सन अध्यक्ष ऋतुराज सापकोटां जारी याःगु विज्ञप्ति धयातःगु दु, ‘२०७६ सालया ल्यं दनिगु ध्यबा सम्भव दुसा चुक्ता यायेत व २०७७ सालया विद्यालययात पुलेमाःगु शुल्क पुलेगु थेंज्याःगु आर्थिक गतिविधिइ ब्वति कयाः विद्यालययात फयांफछि ग्वाहालि यायेत हार्दिक अपिल याना ।’

मेखे सरकारं धाःसा चैत महिनाया हे शुल्क मकायेत न्हापा हे विद्यालययात निर्देशन ब्यूगु खःसा अनलाइन कक्षाया नं शुल्क कायेदइमखु धयातःगु दु।विद्यालयया सञ्चालकपिंसं धाःसा कोराेनाया कारणं विद्यालय नं जटिलअवस्थाय् थ्यंगु धासें शुल्क पुलेत अभिभावकपिंत इनाप याःगु दु ।

निगुलिं प्याब्सनं वंगु वैशाखं निसें अनलाइन कक्षा न्ह्याःगु धासें उकिया ध्यबा नं म्हयेगु खँ धाःगु दु। तर नियमित रूपं अनलाइन कक्षा न्ह्याःगु धाःसां अप्वःथाय् वंगु असार १ गतेनिसें जक न्ह्याःगु खनेदु। निजी स्कूलया संगठनतय्सं शुल्क पुलेत धयाच्वंगु इलय् निजी विद्यालयतय्सं धाःसा थःपिंथाय् ब्वंकाच्वंपिं शिक्षक-शिक्षकापिंत धाःसा तलब बियामच्वंगु सीदुगु दु। आपालं निजी स्कुलतय्सं तलब जक मबिउगु मखुसें गुलिखे शिक्षकतय्त विदा तकं बियाछ्वयाच्वंगु दु ।