ने. सं. ११४४ कौलाथ्व दुतिया -

चैतंनिसें फ्वगिंमुक्त महानगर

येँ – येँ महानगरपालिकां थ्वहे वइगु वि.सं. २०७५ सालया चैत मसान्त तक येँ जिल्लायात फ्वगिं मुक्त यायेगु अभियान शुरु याइगु जूगु दु ।
वंगु दँय् पशुपति क्षेत्रयात फ्वगिं मुक्त क्षेत्र दयेकेगु कथं न्ह्याःगु अभियानयात आः येँय्न्यंकं विस्तार यायेगु तयारी जुयाच्वंगु खँ पशुपति विकास कोषं धाःगु दु ।

येँ महानगरपालिका, कोष, महानगरीय प्रहरी परिसर येँ, मानव सेवा आश्रम, रक्षा नेपाल, स्नेही काख नेपाल, आमाघर लगायत संस्थाया सहकार्य राजधानीयात फ्वगिं मदुगु थाय् दयेकेत्यंगु खः । फ्वनाः नइगु पेसायात निरुत्साहित यायेत, असहाय, जोखिम जीवन म्वानाच्वंपिं, छेँ बुँ मदुपिनिगु म्वायेगु अधिकार सुनिश्चित यायेगु योजना कथं थज्याःगु योजना हःगु खः ।

थुगु योजना कार्यान्वयन यायेगु निंतिं येँ मनपां मानव सेवा आश्रमयात मासिक १ लाख ६७ हजार छेँया बाः पुलेत ग्वाहालि यायेधुंकूगु खँ धाःगु । लँय् फ्वनेगु व्यवसाय यानाच्वंपिं विशेष यानाः येँया गोकर्णेश्वर महादेव मन्दिर, बौद्ध स्तुप, तिंख्यया महांकाल, टेबहाया संकटा, घण्टाघरया जामे मस्जिद, बसन्तपुर दरवार क्षेत्र, स्वयम्भू चैत्य, सुन्धारा , रत्नपार्क व भृकुटी मण्डप लागाय् यानाच्वंगु दु । मनपां थौंकन्हय् चान्हय् चान्हय् चाःहिलाः लँय् द्यनीपिंत उद्धार यानाच्वंगु दु ।

लिसें पशुपति विकास कोषं लँय् फ्वनेगु व्यवसाय यानाच्वंपिंत निरुत्साहित यायेगु निंतिं छगू कार्यविधि दयेकेगु तयारी यानाच्वंगु खँ सीदुगु दु । उकिया निंतिं पशुपतिइ आम्दानी जुइगु निश्चित प्रतिशत फ्वनेगु व्यवसाय यानाच्वंपिनिगु व्यवस्था यायेत फ्यायेगु तयारी नं जुयाच्वंगु दु ।