‘नेपाल संवत्यात कयाः ज्याझ्वः यायेत प्रज्ञाप्रतिष्ठान तयार’

येँ (नेपालभाषा टाइम्स)- नेपाल प्रज्ञा प्रतिष्ठानया कुलपति भुपाल राईं नेपाल संवत्यात कयाः ज्याझ्वः यायेत प्रज्ञा प्रतिष्ठान तयार दुगु खँ धयादीगु दु । शंखधर दिवसया लसताय् मंगलवाः शंखधर पार्क रत्नपार्क जूगु ज्याझ्वलय् मू पाहाँया कथं न्ववानादिसें कुलपति राईं नेपाल संवत् व उकिया प्रवर्तक शंखधर साख्वाःया बारे राष्ट्रिय रुपं चर्चा यायेमाःगु आवश्यकता दु धासें प्रज्ञा प्रतिष्ठान थज्याःगु ज्याझ्वः यायेत तयार दुगु खँ धयादीगु खः ।

नेपाल संवत् न्हूदँ राष्ट्रिय समारोह समिति ११४५ या नायः राजेन्द्र श्रेष्ठया सभापतित्वय् जूगु ज्याझ्वलय् न्वाः न्ह्यलुवाः मल्ल के सुन्दर, नेवाः देय् दबूया नायः पवित्र वज्राचार्य, नेपाल संवत् राष्ट्रिय संरक्षण समितिया नायः प्रा.डा. नरेशमान वज्राचार्यपिंसं न्ववानादीगु खः ।

शंखधर ध्वाखाय् विशेष ज्याझ्वः
शंखधर साख्वाः स्मृति केन्द्रया ग्वसालय् मंगलवाः हे येँ रामघाटय् च्वंगु शंखधर ताँ क्वसं च्वंगु शंखधरया झ्वाताय् स्वांमाः क्वखायेकुसें शंखधर दिवस हंगु दु । केन्द्रया नायः लोककवि राजभाइ जकःमिया सभापतित्वय् जूगु ज्याझ्वलय् येँ महानगरपालिका २० वडाया अध्यक्ष राजेन्द्र मानन्धर मूपाहाँ कथं झायादीगु खः ।

ज्याझ्वलय् न्ववानादिसें सभापति जकःमिं येँ २० वडापाखें हनुमानध्वाखा सम्पदा क्षेत्रय् दुहां वनेगु थुगु लँपुइ शंखधरया नामं ध्वाखा दयेकूगु तसकं च्वछायेबहः जूगु खँ धयादिल । थ्व झ्वलय् वय्कलं बागमति प्रदेश सरकारपाखें थन याकनं हे शंखधरया तःधिकःम्ह झ्वाःताः तयेत्यंगु जानकारी नं बियादीगु खः ।

नेपालभाषा टाइम्स

च्वमिया मेमेगु

• ज्यापु दिवसया लसताय् सुकुन्दा र्‍याली
• मस्तय् अनलाइन जोखिमपाखें सुरक्षित यायेत सरकार प्रतिबद्ध
• ‘आः विमान न्यायेत फुक्क हे ग्याइगु जुल’
• नेवाः हना सिरपाः लःल्हात
• एनपिएलय् न्हापांगु शतक, पोखरा व कर्णाली त्यात