न्हिकं व अचः दीक्षा काःपिंत दसिपौ लःल्हात

येँ(नेपालभाषा टाइम्स)÷नेपाल वज्रयान महाविहार (लुम्बिनी) व नेपाल परम्परागत बौद्ध धर्म संघ कान्तिपुर शाखाया मंकाः ग्वसालय् जूगु न्हिकं (पंचाभिषेक) व अचः (अचलाभिषेक) दीक्षा काःपिंत दसिपौ लःल्हाःगु दु । वंगु पोहेलागा आमैकुन्हु नंसालय् च्वंगु शंकरदेव जयकीर्ति महाविहारय् जूगु ज्याझ्वलय् दसिपौ लःल्हाःगु खः ।

नेपाल वज्रयान महाविहारया नायः प्रा. डा. नरेशमान वज्राचार्यया मूलाचार्यत्वय् न्हिकं व अचः दीक्षा बीगु ज्या जूगु खः । महाविहारय् विराजमान लोकेश्वर द्यःया न्ह्यःने देवा च्याकाः उलेज्या याःगु ज्याझ्वलय् ज्याझ्वःया कजि राजगुरुजु मञ्जुश्रीरत्न वज्राचार्यं लसकुस यानादीगु खः । ज्याझ्वलय् मूपाहांकथं झायादीपिं बागमति प्रदेशसभा सदस्य शैलेन्द्रमान वज्राचार्य, शाक्य महाविहार संघया नायः शुभकाजी शाक्य व उदाय समाजया नायः डा. रुपज्योति कसाः झायादीगु खः ।

ज्याझ्वलय् नवासें बागमति प्रदेश सांसद वज्राचार्यं झीगु झीगु सम्पदाया संरक्षण याना तयेमाःगु खँय् बः बियादिल । लिसें वय्कलं बौद्ध धर्म व संस्कृतियात च्वन्ह्याकेत न्हिकं व अचः थेंज्याःगु दीक्षा मेमेगु समुदाययात बिया वनेमाःगु धारणा तयादीगु खः ।

संघया नायः शाक्यं झीगु न्हिथंया जीवनय् माःगु न्हिकं व अचः थेंज्याःगु दीक्षा न्हू पुस्तायात बीगु तसकं बांलाःगु ज्या खः धासें आः मेमेगु नं दीक्षा बिया वनेमाः धयादिल ।

समाजया नायः कसां विपश्यना ध्यानया महत्व व आवश्यकताया बारे जानकारी बियादिसें उदाय समाजं सामाजिक विधि व्यवहारयात कःघानाः नं समाज सुधारया निंतिं थीथी नीति नियम दयेकाः वनाच्वनागु खँ न्ह्यथनादिल ।

ज्याझ्वःया सभापतिया थासं प्रा. डा. वज्राचार्यं न्हिकं व अचःया बारे संक्षितप्त जानकारी बियादिसें थौंया व्यस्त जीवनशैलीं झीगु सामाजिक व सांस्कृतिक जीवनय् आपालं विकृति दुहां वयाच्वंगुलिं उकियात भिंकाः वनेगु स्वयेमाः धयादिल ।

ज्याझ्वलय् न्हिकं काःपिं ७४ म्ह व अचः दीक्षा काःपिं ७६ म्हेसित दसिपौ लःल्हाःगु खः । नंसाःस्थित महाविहारय् वंगु पुष २९ गते न्हिकं व पुस ३० गते अचः दीक्षा बिउगु खः ।

सम्बन्धित बुखँ

LEAVE YOUR COMMENTS