राष्ट्रपति वनेवं लाक्वपाक्व

येँ – निन्हुया नेपाः भ्रमणय् झाःम्ह चिनियाँ राष्ट्रपति सी चिनपिङ लिहां वनेवं हे वय्कःयात लसकुस यायेगु लागिं येँया थाय्थासय् तयातःगु गमलां स्वां थ्वयेगु शुरु जूगु दु । राष्ट्रपति लिहां वनेवं सुरक्षा हलुका जुइवं लँय् वयाच्वंपिं मनूतय्सं हे स्वां थ्वया यंकूगु खः । अथे हे गुलिखे थासय् धाःसा न्हू पी हःगु ततःमागु सिमाय् ह्वयाच्वंगु स्वां नं थ्वया यंकूगु खने दत ।

राष्ट्रपतिया फिर्ती सवारी जुइवं सुरक्षाकर्मीतय्सं नं याउँसे महसुस यासें लँय् स्वां थ्वयाच्वंगु नं तुलुतुलु स्व जक स्वयाच्वंगु खः । राष्ट्रपति चिनफिङयात लसकुस यायेगु लागिं त्रिभुवन विमानस्थलंनिसें सोल्टी होटल तकया लँपुइ सरकारं न्हूगु हे पीच याकूगु खःसा सतकया जवंखवं स्वां ह्वयाच्वंगु गमला तयाः समाः याःगु खः ।

३५ दँ न्ह्यवंनिसें फोहोर जुइक वानातःगु तीनकुनेया खुल्ला थासय् तकं न्हय्न्हुया दुने पहाड थें दयेकाः स्वां व सिमा पिनाः क्यब दयेकूगु खः ।
चिनियाँ राष्ट्रपतिया थ्व भ्रमणय् भारतीय प्रधानमन्त्री नरेन्द्र मोदी वःबलय् थें यातायात अस्तव्यस्त मजूगु खँय् धाःसा मनूत लय्ताःगु दु ।