नेपालभाषा मचा सिरपाः लःल्हात
येँ(नेपालभाषा टाइम्स)- स्कुलय् आखः ब्वनाच्वंपिं ब्वँमि मस्तय्त नेवाःभाय् प्रति आकर्षण अप्वयेकेगु, इमित सम्मान व प्रोत्साहित यायेगु ल्याखं लःल्हाना वयाच्वंगु ‘नेपालभाषा मचा सिरपाः’ लःल्हाःगु दु । नेवाः वस्ती नेवाः स्कुल अभियानया ग्वसालय् छुँ दँ न्ह्यःनिसें थीथी कारणं दिनाच्वंगु थुगु सिरपाः वंगु शुक्रवाः येँ महानगरपालिका २७ वडा ज्याथाय् च्वंगु अन्नपूर्ण उच्च माध्यमिक विद्यालयय् जूगु छगू ज्याझ्वःया दथुइ लःल्हाःगु खः ।
थ्व स्वयां न्ह्यः थीथी ब्वनेकुथिया निश्चित तगिंया ब्वँमि मस्तय् दथुइ न्यनेकने, परीक्षाया रुपय् संचालन यानाः लःल्हायेगु याना वयाच्वंगु थुगु सिरपाः थुगुसी बिस्कंकथं सिरपाः लःल्हायेगु ग्वसाःकथं येँ महानगरपालिका २७ वडा दुनेया सामुदायिक, गुथि व निजी ब्वनेकुथिया ब्वँमिपिंत जक थुगु सिरपाः लःल्हाःगु खः । अथे हे थ्व स्वयां न्ह्यः निश्चित तगिंया ब्वँमिपिनि दथुइ धेंधेंबल्लाः यानाः नीम्ह ब्वँमिपिंत लःल्हाना वयाच्वंगु थ्व सिरपाः थुगुसी वडा दुनेया दक्वं ब्वनेकुथिया ४३ म्ह ब्वँमिपिंत सिरपाः लःल्हाःगु खः ।
थुगुसी २७ वडा दुनेया महाँकाल माध्यमिक विद्यालय, त्यौड माध्यमिक विद्यालय, अन्नपूर्ण उच्च माध्यमिक विद्यालय, दरवार हाईस्कुल÷भानु माध्यमिक विद्यालय, व अलबर्ट आइन्सटाइन्स एकेदेमिया तगिं छगूनिसें च्यागूतकया च्याम्ह च्याम्ह ब्वँमि व संस्कृति माध्यमिक विद्यालयया तगिं खुगूनिसें च्यागू तकया स्वम्ह ब्वँमियात ‘नेपालभाषा मचा सिरपाः’ व ‘नेपालभाषा ब्वनामि सिरपाः’ लःल्हाःगु खः ।
नेवाः बस्ती नेवाः स्कुल अभियानया संयोजकलिसें मचा सिरपाःया छम्ह कजि दीपक तुलाधरया सभापतित्वय् जूगु ज्याझ्वलय् येँ महानगरपालिका २७ वडाअध्यक्ष योगेशकुमार खड्गी मूपाहांकथं झायादीगु खः ।
ज्याझ्वलय् पुरस्कृति ब्वँमिपिंत अभियानया कजि तुलाधरं खादा क्वखायेकादीगु खःसा मूपाहां वडाअध्यक्ष खड्गी दसिपौ लःल्हानादीगु खः । अथे हे सिरपाःया कोषय् आर्थिक ग्वाहालि निंतिं संयोजन यानादीम्ह सुनिलकुमार शाक्य, कोषय् आर्थिक ग्वाहालि यानादीपिं डा. विजयप्रकाश सैंजू, मासाहिरो यामाकावा (ब्यांचा दाई), कुमुद श्रेष्ठ लगायतया दातापिंसं दां, दोहलपा लःल्हानादीगु खः ।
न्हापा प्रत्येक ब्वनेकुथिपाखें निश्चित ब्वँमि दुथ्याकाः न्ह्यसः न्यनेगु, च्वयेगु व ब्वनेगु यानाः सिरपाः लःल्हाना वयाच्वंगु थासय् थुगुसी येँ महानगरपालिकां लागू यानाः स्थानीय पाठ्यक्रम ‘येँ देय् म्हसीका’या लिधंसाय् छगूनिसें च्यागू तगिं तक प्रत्येक तगिमय् उत्कृष्ट ब्वँमि ल्ययाः सिरपाः लःल्हाःगु खः । थुगुसी महाँकाल माध्यमिक विद्यालयया तगिं छगूनिसें च्यागू तकया प्रियंका रायमाझी, जिक्रा खातुन, रितिका तिमिल्सिना, अम्बिका श्रेष्ठ, सपना श्रेष्ठ, संदीप कपाली, अञ्जली रौनियार व सुजन श्रेष्ठ, त्यौड माध्यमिक विद्यालयया सुजितकुमार मण्डल, शिभमकुमार गुप्ता, रोशनी शिवाकोटी, दिया बराइली, सुजाता बस्नेत, सुरजकुमार ठाकुर, अनिता तामाङ व बर्षा माझी, दरवार हाईस्कुल÷भानु माध्यमिक विद्यालयया आदिती कुमारी, पियुषकुमार यादव, सोहित महर्जन, कुशल महर्जन, मेघा श्रेष्ठ, व्यवस्ती शाही, दिनेश कार्की व लूनिभाः कार्की, अन्नपूर्ण उच्च माध्यमिक विद्यालयया सौगात खड्गी, द्रिसना महर्जन, छिरिङ शेर्पा, कुसुम धिताल, न्हूजला मानन्धर, समृद्धि वज्राचार्य, कञ्चन प्रजापति व क्रिन्जल शाही अल्बर्ट आइन्सटाइन्स एकेदेमिया कृष्मा श्रेष्ठ, तिमिला महर्जन, सौगात थापामगर, श्रृष्टि पौडेल, एल्भा सिंक, आयुषा श्रेष्ठ, पेम्बा मोक्तान व सुदिका वज्राचार्य व संस्कृत माविया आशुतोष ढुंगेल, अंकित पाठक व सन्देश बडालयात सिरपाः लःल्हाःगु खः । सिरपाःया निंतिं जनस्तरं संकलन यानातःगु ध्यबा व कोषया ब्याजपाखें दक्वं ब्वँमिपिंत म्हतिं न्याद्वः तका दांया ल्याखं सिरपाः लःल्हाःगु खः ।
ज्याझ्वलय् थःगु ब्वनेकुथिया उच्च माध्यमिक तगितय् नेपालभाषा अध्यापन याकेत मू भूमिका म्हितादीगु नापं ब्वनेकुथिया साइनबोर्डय् दकलय् न्हापां रञ्जना लिपि छृयलेगु ज्याय् ज्वःमदुगु भूमिका म्हितादीगु धासें त्यौड माध्यमिक विद्यालयया प्रधानाध्यापक सुरेन्द्र केसीयात विशेषकथं हनेज्या नं याःगु खः ।
उगु इलय् पाहांकथं झायादीपिं नेवाः न्ह्यलुवा मल्ल के. सुन्दर मूपाहां २७ वडाअध्यक्ष योगेशकुमार खड्गी, १८ वडाअध्यक्ष न्हुछेकाजी महर्जन, सिरपाःया निंतिं आर्थिक संयोजक सुनिलकुमार शाक्य लगायतं नुगःखँ तयादीगु खः ।
थुकथंया सिरपाःया व्यवस्थां स्थानीय भाषां ब्वनीपिं ब्वँमि, ब्वंकीपिं स्यनामि व ब्वनेकुथि नापं अभिभावक नं अप्वइगु विश्वास प्वंकादिसें अभियानय कजि तुलाधरं थुगुसी सिरपाः त्याकादीपिं अप्वःथें गैर नेवाः मस्त जूगु जानकारी बियादीगु दु ।
LEAVE YOUR COMMENTS