ने. सं. ११४६ अनलाथ्व पुन्हि -

अमेरिकी म्युजियमय् स्वनिगलं खुयायंकूगु मूर्ति

येँ (नेपालभाषा टाइम्स)÷ स्वनिगलं खुयायंकूगु उमा महेश्वरया छगू मूर्ति अमेरिकाया न्यूयोर्कय् च्वंगु बु्रकलिन म्युजियमय् लुइकूगु दु । प्यसः दँ मल्याक पुलांगु थ्व मूर्ति थ्यंमथ्यं प्यंगू दशक न्ह्यः स्वनिगःया ओमबहालं खुयायंकूगु धयातःगु दु । तर थ्व ओमबहाः धाःगु येँया खःकि यलया खः धयागु स्पष्ट मजूनिगु खँ नेपाःया सम्पदा माला वयाच्वंगु संस्था ‘लस्ट आर्टस् अफ नेपालं’ धाःगु दु । थ्व मूर्तिइ नेपाल संवत् ७०९ कियातःगु दु । म्यूजियमया कथं थ्व म्यूजियमयात उपहार कथं वःगु खः ।

अथेहे नेपाल संवत् १६०९ या छगू चर्तुमुखी शिवलिंग छम्ह फ्रेञ्च कला संग्रहयाके दुगु खँ नं लस्ट आर्टस अफ नेपालं धाःगु दु । थ्व पशुपतिया मृगस्थलीं तंगु मूर्ति जूगु अनुमान यानातःगु दु ।