स्वनिगलय् लः माग स्वयां तसकं म्हो जक वितरण

येँ – स्वनिगलय् माग स्वयां तसकं म्हो जक त्वनेगु लःया वितरण जुयाच्वंगु दु । स्वनिगलय् न्हिं ४३ करोड लिटर लःया माग दुसां काठमाडौं उपत्यका खानेपानी लिमिटेडं उकी स्वब्वय् छब्व अर्थात १३ करोड लिटर स्वयां म्हो जक लः वितरण यानाच्वंगु दु ।

पुस, माघ व फागुनय् न्हि १३ करोड लिटर लः वितरण यायेफुसां चैत व वैशाखय् ला अझ थ्व स्वयां म्हो न्हिं ११ करोड लिटर जक लः बीफइगु खँ लिमिटेडं धाःगु दु । वा वइगु मौसमय् धाःसा न्हिं १६करोड लिटर तक लः वितरण जुयाच्वंगु दु । पुस लिपा स्वनिगलय् स्रोतया लः म्हो जुइवं लःया समस्या जुइगु खँ केयुकेएलया प्रवक्ता प्रकाशकुमार राईं धयादीगु दु ।

स्वनिगलय् दँय् १० प्रतिशतया ल्याखं लःया माग अप्वइगु छगू अध्ययनं सीदुगु दु । स्वनिगलय् अप्वया वनाच्वंगु जनसंख्याया चाप, छेँ लगायत भौतिक संरचना दयेकेगु अप्वया वयाच्वंगु व प्राकृतिक स्रोत धमाधम सुना वनाच्वंगुलिं त्वनेगु लःया अभाव झन अप्वया वनाच्वंगु खः ।

स्वनिगःया लःया समस्या ज्यंकेगु निंतिं २०६४ सालय् काठमाडौं उपत्यका खानेपानी लिमिटेड गठन याःगु खः । खानेपानी संस्थानं छुटे यानाः अलग हे कम्पनी गठन याःसां स्वनिगलय् वयाच्वंगु लः समस्याय् धाःसा छुं हिउपाः हयेफुगु मदुनि ।