विप्लवपाखें वार्ता अस्वीकार

सरकारपाखें सकसितं वार्ताय् वयेत आह्वान

येँ (नेपालभाषा टाइम्स)÷नेत्र विक्रम चन्द विप्लवया नेतृत्वय् दुगु माओवादी पार्टी लगायत तराईलय् सक्रिय जुयाच्वंगु थीथी सशस्त्र पुचःतलिसे वार्ता यायेगु लागिं सरकारं सार्वजनिक रुपं आह्वान याःसां विप्लवया माओवादी पार्टीं उगु आह्वानयात अस्वीकार याःगु दु ।

विप्लव माओवादीं वर्तमान सरकारलिसे वार्ता यायेगुया छुं औचित्य मदु धासें वं आह्वान याःगु वार्ताय् थःपिं सहभागी मजुइगु खँ धाःगु दु ।
माओवादी पार्टीया वरिष्ठ नेतातय्त समेत सरकारं ज्वनाः कुनेगु ज्या यानाच्वंगु कारणं थुकिं यानाः वार्ता यायेगु मखु बरु झन् समस्या तच्वया वनीगु जक सम्भावना दु धासें थज्याःगु अवस्थाय् सरकारलिसे वार्ता यायेगुया छुं औचित्य मदुगु खँ धाःगु दु ।

सरकारं विप्लव माओवादीया प्रवक्ता लिसें पुलांम्ह मन्त्री खड्गबहादुर विश्वकर्मा प्रकाण्डयात ज्वनाः कुनातःगु दु । वय्कःयात त्वःतेगु लागिं अदालतं स्वक्वः तक आदेश जारी यायेधुंकाः नं त्वःतेगु व हानं ज्वनेगु ज्या याःगु कारणं यानाः विप्लव पार्टी तसकं तम्वयाच्वंगु दु ।

सूत्रतय्सं धाः कथं न्ह्यःने वयाच्वंगु विमस्टेक सम्मेलनया झ्वलय् छुं कथंया विध्वंशकारी ज्या मजुइमा धकाः प्रकाण्डयात सरकारं ज्वंगु खनेदु । तर विप्लव माओवादीं थः नेतातय्त लाथेपाथे ढंगं ज्वनेगु ज्या यानाच्वंगु सरकारलिसे थःपिंसं वार्ता याये फइ मखु धाःगु दु ।
सरकारं विप्लव पार्टीलिसे हे वार्ता यायेगु ताः तयाः पार्टी पुचः हे गठन यासें वार्ताया आह्वान याःगु खः ।

तर गुगु पुचःयात लक्षित यानाः वार्ताया आह्वान याःगु खः, आः वहे पुचलं वार्ता याये मखु धाःगु कारणं सरकारं गठन याःगु वार्ता पुचःया नं औचित्य दइ वा दइ मखु धइगु खँय् न्ह्यसः पिहां वःगु खँ धाःगु दु ।

कुतः जारी हे जुइ
सरकारं विप्लव माओवादी लगायत तराईलय् सक्रिय जुयाच्वंगु थीथी सशस्त्र पुचःलिसे वार्ता यायेगु ताः तयाः निन्हु न्ह्यः जक न्याम्ह दुजः दुगु छगू पार्टी पुचः गठन याःगु खः । थ्व पुचलं विप्लव माओवादी लगायत तराईलय् सक्रिय जुयाच्वंगु सशस्त्र पुचः व खास यानाः पृथकतावादी आन्दोलन यानाच्वंगु सीके राउतया पुचःयात वार्ताय् हयेत कुतः याःगु दु ।

तर आः विप्लव माओवादीं वार्ताय् वये मखु धाःसां तराईया पुचःतय्सं धाःसा आः तक वार्तायात अस्वीकार याःगु मदुनि । सरकारं फयांफछि सकस्यांलिसे वार्ता यायेगु खँ धाःगु दु ।